Misri yaanzisha mradi wa majaribio wa 'Chekechea Misikitini'

IQNA – Mamlaka za Misri zimezindua mradi wa majaribio wa kutumia maeneo ya misikiti kwa elimu ya awali ya watoto chini ya makubaliano mapya ya ushirikiano kati ya Wizara ya Wakfu na Wizara ya Elimu.

Mpango huu mpya, ambao umeanza kutekelezwa katika Misri, unakusudia kutumia maeneo ya misikiti kwa shughuli za chekechea wakati wa asubuhi. Hii inatekelezwa kwa mujibu wa maelekezo ya Rais Abdel-Fattah El-Sisi ya kuboresha ushirikiano kati ya wizara mbalimbali katika utoaji wa huduma kwa umma. Tangazo hili limetolewa kupitia taarifa ya pamoja siku ya Jumatano.

Mradi huu umeidhinishwa kupitia itifaki ya ushirikiano iliyosainiwa na Waziri wa Wakfu Sheikh Osama El-Azhari na Waziri wa Elimu, Mohamed Abdel Latif, katika makao ya Wizara ya Wakfu.

Kwa mujibu wa makubaliano hayo, Wizara ya Elimu itawateua walimu waliobobea kushughulikia vipindi vya elimu na burudani kwa watoto. Vifaa vya kujifunzia pamoja na vifaa vya michezo vitatolewa, na shughuli zote zitakamilika kabla ya sala ya Adhuhuri ili kuandaa msikiti kwa ibada.

Katika awamu ya mwanzo, msikiti mmoja kwa kila kijiji utachaguliwa kwa ajili ya majaribio, huku maboresho na upanuzi ukizingatia mafanikio na uwezo wa utekelezaji.

Sheikh El-Azhari alisisitiza nafasi muhimu ya misikiti katika kukuza elimu ya awali, usomaji, maadili mema, na utambulisho wa kitaifa, hasa kwa kuzingatia changamoto za maudhui ya kidijitali yanayowafikia watoto. Kwa upande wake, Waziri Abdel Latif alieleza kuwa Wizara ya Elimu inatilia mkazo malezi ya maadili pamoja na maendeleo ya kielimu katika hatua za awali za maisha ya mtoto.

Mpango huu ni sehemu ya mkakati mpana wa kitaifa unaolenga kupanua upatikanaji wa elimu ya awali kwa watoto wa Misri. Takwimu kutoka Wizara ya Mambo ya Kijamii zinaonesha kuwa kwa sasa kuna chekechea 16,560 zilizosajiliwa, ambazo zinahudumia asilimia 8 tu ya mahitaji ya kitaifa. Watoto 621,806 kwa sasa wameandikishwa katika vituo hivyo.

Mnamo mwezi Juni, wizara ilizindua uchunguzi wa kitaifa kutathmini hali ya miundombinu ya chekechea, kuboresha uendeshaji wake, na kuongeza idadi ya watoto wanaojiunga.

Mkoa wa Qena umechaguliwa kama eneo la majaribio ya awali. Mkoa huo una wakazi wapatao milioni 3.7, ambao ni sawa na asilimia 3.4 ya idadi ya watu wa Misri, kwa mujibu wa takwimu za Shirika Kuu la Takwimu na Mipango ya Umma (CAPMAS).

3493973