Akiwa gerezani, mfungwa ahifadhi Qur’ani Tukufu kikamilifu

IQNA – Mfungwa mmoja katika mkoa wa Balıkesir, nchini Uturuki, amefikia daraja ya Hafidh, baada ya kuhifadhi Qur’ani Tukufu yote kupitia mpango wa elimu ya magerezani unaoungwa mkono na serikali.

Mfungwa huyo aliyekuwa akishikiliwa katika Gereza la Kepsut la Balıkesir amekamilisha kwa mafanikio programu ya kuhifadhi Qur’ani Tukufu, ikiwa ni hatua muhimu katika juhudi za urekebishaji na marejesho ya kimaadili zinazoratibiwa kwa pamoja na Wizara ya Haki na Rais wa Masuala ya Dini Uturuki.

Mafanikio haya yametokana na utekelezaji wa makubaliano ya ushirikiano kati ya taasisi hizo mbili, yenye lengo la kuwapatia wafungwa elimu pamoja na msaada wa kiroho. Programu hiyo inaendeshwa na Kitengo cha Uongofu wa Kiroho ndani ya gereza, kwa uratibu wa Ofisi ya Mufti wa Mkoa wa Balıkesir.

Baada ya kukamilisha mafunzo ya kuhifadhi Qur’ani, mfungwa huyo alifanya Mtihani wa Ustadi wa Kuhifadhi Qur’ani, ulioandaliwa na kamati maalum iliyoteuliwa na Rais wa Masuala ya Dini. Alifaulu mtihani huo na kukabidhiwa cheti rasmi kinachothibitisha kuhifadhi Qur’ani Tukufu yote.

Mpango huu ni sehemu ya juhudi pana za kuwapatia wafungwa fursa za kujijenga binafsi na kiroho wanapotekeleza vifungo vyao. Maafisa wanaamini kuwa miradi ya aina hii huchangia katika marejesho ya kijamii, kurekebisha tabia, na kupunguza kurejea tena katika uhalifu.

Habari inayohusiana:

• Maelfu ya wavulana, wasichana wahitimu kuhifadhi Qur'ani Uturuki

Ushirikiano kati ya Wizara ya Haki ya Uturuki na Rais wa Masuala ya Dini umeongeza wigo wa programu za elimu na urekebishaji katika magereza mbalimbali nchini humo, ukilenga nyanja za uongofu wa kiroho, mafunzo ya ufundi, na msaada wa kisaikolojia, ikiwa ni jitihada za kumrejesha mfungwa katika jamii akiwa na mwelekeo mpya wa maisha.

3496233