Malaysia kutumia Misikiti kama vituo vya kuendeleza vijana

IQNA – Katika juhudi za kuwaongoza vijana kupitia malezi ya kiroho, kijamii na kitaaluma, serikali ya Malaysia iko mbioni kuanzisha mtandao wa misikiti itakayofanya kazi kama vituo vya mstari wa mbele kwa shughuli za maendeleo ya vijana.

Serikali inapanga kutumia taasisi za kidini, kuanzia na misikiti, kama vituo muhimu vya kuendeleza vijana kitaifa. Wizara ya Vijana na Michezo (KBS) kwa kushirikiana na Idara ya Waziri Mkuu (Masuala ya Kidini) zimerasimisha ushirikiano wao ili kuimarisha juhudi hizi kupitia mpango wa Rakan Muda.

Waziri wa Vijana na Michezo, Mohammed Taufiq Johari, alisema kuwa vijana wenye ushindani na uwezo ni nguzo muhimu kwa uongozi wa taifa la baadaye.

Alisisitiza kuwa maendeleo ya vijana yanapaswa kuanza mapema, huku misikiti ikitumika si kama maeneo ya ibada pekee, bali pia kama vituo vya malezi ya kijamii.

“Misikiti si maeneo ya ibada tu, bali pia ni nafasi za kulea tabia njema na kujenga utambulisho wa vijana,” alisema katika mkutano wa pamoja na vyombo vya habari.

Aliongeza kuwa misikiti inaweza kuwa vituo vya kuzalisha mawazo bunifu, kuandaa shughuli za michezo, na kulea vijana wenye afya njema kimwili na kiroho.

Mpango huu unatarajiwa kupanuliwa baadaye ili kujumuisha pia maeneo mengine ya ibada kama mahekalu na madhabahu.

“Lengo letu ni kuwafikia vijana kote Malaysia, na pili, kuvuka mipaka ya dini,” alisema Dkt. Mohammed Taufiq. Maelezo mahsusi kuhusu utekelezaji na aina za programu yatatangazwa tarehe 16 Februari.

Habari inayohusiana:

• Vijana wanapaswa kuwa kitovu cha mazingatio ya ubunifu wa matangazo yanayotegemea mbinu za kisasa

Waziri katika Idara ya Waziri Mkuu (Masuala ya Kidini), Dkt. Zulkifli Hasan, alisema kuwa ushirikiano huo unaashiria mabadiliko ya mkabala.

“Tunaelekea katika mtazamo wa mbele zaidi, wa kimaendeleo na wenye uhai,” alisema. Alisisitiza kuwa ushirikiano huo unalenga kujenga taifa na kuimarisha mshikamano baina ya jamii zote.

“Si suala la Waislamu pekee, bali ni kuhusu kuimarisha mwingiliano na uelewano miongoni mwa dini na jamii zote,” alisema Zulkifli.

3496297