Malaysia Yanasa Nakala 6,620 za Qur’ani kwa Kukiuka Viwango

IQNA – Zaidi ya nakala 6,600 za Qur’ani Tukufu na maandiko yanayohusiana nayo, zenye thamani ya zaidi ya RM378,000, zimekamatwa na Wizara ya Mambo ya Ndani ya Malaysia katika operesheni ya miezi mitatu baada ya kubainika kuwa hazikukidhi viwango vya kidini au zilikuwa na makosa.

Nakala za Qur’ani na vielelezo vyake zilikamatwa kati ya Januari 1 na Machi 31 kupitia Operesheni Mulia (Ops Mulia), baada ya kugundulika kuwa na makosa au kutokidhi vigezo vilivyowekwa na mamlaka za kidini.

Waziri wa Mambo ya Ndani, Datuk Seri Saifuddin Nasution Ismail, alisema operesheni hiyo iliyotekelezwa na Kitengo cha Utekelezaji na Udhibiti cha wizara hiyo ilihusisha ukaguzi wa maeneo 1,758 ili kuhakikisha utekelezaji wa Sheria ya Uchapishaji wa Maandishi ya Qur’ani ya mwaka 1986.

Akasema: “Wao ndio wanawajibika kuchukua hatua endapo kutapatikana nakala au misahafu yenye makosa au isiyofuata viwango vya mamlaka za kidini.

Hata mabadiliko madogo, kama herufi ndogo au alama ya tashkili, yanaweza kubadili maana. Hivyo ni lazima kuhifadhi usahihi na hadhi ya msahafu.”

Alichukua fursa hiyo kueleza kuwa katika kipindi hicho hicho, jalada 44 za uchunguzi zilifunguliwa kwa hatua zaidi, ikiwemo kufikishwa mahakamani au kutolewa kwa notisi za adhabu.

Aidha alisema kuwa udhibiti juu ya usambazaji wa Qur’ani hauhusiki na nakala zilizochapishwa tu, bali pia unajumuisha nakala za kidijitali na sauti, ikiwemo zile zinazouzwa kupitia majukwaa ya biashara mtandaoni.

“Maumbo yote haya yanahitaji idhini ya mamlaka inayojumuisha wataalamu na wanazuoni wa Kiislamu wanaochunguza maudhui kwa umakini,” alisema.

Akizungumzia programu iliyofanyika ndani ya chombo cha KM Tun Fatimah cha Wakala wa Ulinzi wa Bahari wa Malaysia, Saifuddin alisema nakala 8,672 za maandiko ya Qur’ani, zenye thamani ya RM2.7 milioni, ziliharibiwa kwa njia ya utupaji wa matofali ya majivu yenye uzito wa tani 1.5 baharini karibu na Port Klang.

Alifafanua kuwa utaratibu wa kuzitupa nakala hizo baharini  ulifanyika kwa uangalifu mkubwa wa kuheshimu Qur’ani Tukufu.

Waziri huyo aliongeza kuwa mpango wa Jom Exchange Quran (JEQ), ulioanzishwa mwaka 2023, umeendelea kuonyesha mafanikio makubwa, ikiwa na programu 725 kote nchini, ambapo vitabu 76,235 vilivyokuwa vimeharibiwa, kuchakaa au visivyothibitishwa vilibadilishwa na nakala mpya zilizoidhinishwa na Wizara ya Mambo ya Ndani.

“Kwa mafanikio hayo, mpango wa JEQ umetambuliwa na Malaysian Book of Records kama mpango mkubwa zaidi wa kubadilishana misahafu, jambo linalodhihirisha jitihada za kuimarisha heshima na utukufu wa Qur’ani Tukufu pamoja na kukuza uelewa wa umma,” alisema.

3497127