Qari maarufu wa Iran Ustadh Hamed Shakernejad akutana na balozi wa Hispania Tehran

IQNA – Balozi wa Hispania nchini Iran amekutana na qari mashuhuri wa Qur’ani Tukufu, Hamed Shakernejad, mjini Tehran na kulaani uchokozi wa hivi karibuni uliofanywa dhidi ya Iran.

Antonio Sanchez Benedito Gaspar alisisitiza umuhimu wa mshikamano kati ya mataifa na akaeleza nafasi ya tamaduni za Kiungu na dini katika kukabiliana na dhulma na vurugu, kwa mujibu wa Ofisi ya Uhusiano wa Umma ya Taasisi ya Diplomasia ya Qur’ani.

Balozi huyo wa Hispania pia alirejelea historia na ustaarabu wa Iran, akisema kuwa Iran ni nchi yenye ustaarabu na historia tajiri ambayo imekumbwa na shambulio lisilo la haki.

Aliongeza kuwa kwa karne nyingi Wairani wamekuwa wabunifu wa sanaa zinazovutia macho, jambo linalodhihirisha roho yao kubwa pamoja na utamaduni wao tajiri unaopenda amani.

“Tumeonyesha kuwa tunasimama pamoja na marafiki wetu katika nyakati ngumu, na tuko tayari kuchukua hatua madhubuti kwa ajili ya kuleta amani. Dhulma na vurugu zimekuwa zikilaaniwa daima, na haya ndiyo mafundisho ya pamoja ya dini zote za mbinguni,” alisema.

Katika mkutano huo, Ustadh Shakernejad ambaye pia ni Balozi wa Qur’ani wa Jamhuri ya Kiislamu ya Iran, alizungumzia maendeleo ya dunia na kusema kuwa wataalamu wengi wa siasa na historia wanaamini dunia iko karibu na hatua muhimu ya kihistoria. Aliongeza kuwa wanaamini zama zijazo zitakuwa za mataifa yaliyo na ustaarabu, maadili na uadilifu.

Alisisitiza kuwa bila shaka ushirikiano wa kitamaduni kati ya mataifa yenye asili na yanayojenga ustaarabu utaamua mustakabali wa mahusiano ya kisiasa, kiuchumi na kijamii duniani. Pia alisema kuwa uungwaji mkono wa wananchi na serikali ya Hispania kwa taifa la Iran, ambalo ni lenye kudhulumiwa lakini lenye nguvu, unaonyesha uhalisia wao, heshima na roho ya kibinadamu.

Ustadh Shakernejad pia alirejelea mafundisho ya Qur’ani Tukufu akisema kuwa kujiepusha na vita na kuimarisha moyo wa kujitolea kwa wengine ni kushikamana na kamba ya Mwenyezi Mungu,  wito ambao Qur’ani inawaelekeza wanadamu kuufuata.

Katika mkutano huo pia, Mkurugenzi Mtendaji wa Taasisi ya Diplomasia ya Qur’ani alieleza uwezo na mipango ya kimataifa ya taasisi hiyo katika nyanja ya mwingiliano wa kitamaduni na Qur’ani, pamoja na kuwasilisha maeneo ya ushirikiano wa pamoja, jambo lililokaribishwa na balozi wa Hispania.

3497440