Msikiti Mpya Michigan wafungua milango kwa waumini
Jengo hili la kisasa lenye thamani ya dola milioni 16 limeelezwa na viongozi wa jamii kama alama ya kuanza zama mpya kwa Waislamu wa jimbo la Michigan.
Mapema mwezi huu, mamia ya wanajamii, viongozi wa dini, maafisa waliochaguliwa na wageni mashuhuri walikusanyika Dearborn Heights kusherehekea uzinduzi rasmi wa makao makuu mapya ya IIOA pamoja na kufunguliwa kwa Msikiti wa Imam Al‑Hasanain.
Mradi huu wa dola milioni 16 umetajwa kuwa miongoni mwa miradi mikubwa na yenye athari zaidi ya Kiislamu iliyotekelezwa Michigan katika miaka ya hivi karibuni.
Sherehe za siku mbili ziliashiria hatua muhimu katika historia ya Taasisi ya Kiislamu ya Amerika, iliyoasisiwa mwaka 2015 na Sayyid Hassan Qazwini. Hafla hizo zilijumuisha swala ya kwanza rasmi ya Ijumaa katika msikiti huo tarehe 5 Juni, ikifuatiwa na hafla ya uzinduzi rasmi na chakula cha heshima (gala dinner) usiku uliofuata katika ukumbi mpya wa Imam Al‑Muttaqeen.
Jengo hilo jipya limejengwa katika eneo la ekari saba na lina ukubwa wa takriban futi za mraba 60,000. Linajumuisha Msikiti wa Imam Al‑Hasanain, vyumba vya elimu na vijana, maeneo ya kitamaduni na kijamii, jiko la kibiashara, pamoja na maegesho ya magari zaidi ya 500. Msikiti wenyewe una uwezo wa kuchukua waumini zaidi ya 1,100 na una kuba za dhahabu zinazong’aa, ambazo tayari zimeufanya kuwa alama mashuhuri katika mandhari ya kidini ya Metro Detroit.
Mradi wa kihistoria uliotokana na mahitaji ya jamii
Mradi huu ulianzishwa kutokana na kuongezeka kwa idadi ya waumini katika kituo cha zamani cha IIOA kilichokuwa Ford Road, Dearborn Heights, ambacho kilikuwa kikifurika wakati wa Ramadhani, sikukuu za Idd na hafla kubwa za kijamii. Viongozi wa jamii walisema hitaji la kituo kikubwa zaidi lilikuwa la dharura, hasa kutokana na kupanuka kwa programu za kielimu, kidini na za vijana.
Mchango muhimu ulioufanya mradi huu uwezekane ni wa mfanyabiashara wa eneo hilo, Mike Shehadi, na familia yake, waliotoa ardhi iliyojengwa kituo hicho. Katika sherehe za ufunguzi, Sayyid Hassan Qazwini alimtambua mara kadhaa Shehadi na mkewe, Shadia Shehadi, kwa msaada wao na kujitolea kwao kwa mradi huo.
Viongozi wa dini na serikali waadhimisha ushirikiano wa dini mbalimbali
Hafla ya ufunguzi ilihudhuriwa na viongozi mbalimbali wa dini na serikali, wakiwemo Askofu Mkuu wa Detroit Edward Weisenburger; Meya wa Dearborn Heights Mo Baydoun; Meya wa Dearborn Abdullah Hammoud; Mbunge wa Marekani Rashida Tlaib; mgombea wa Seneti ya Marekani kutoka chama cha Democratic Abdul El‑Sayed; Balozi Mdogo Mkuu wa Iraq mjini Detroit Mohammed Hassan Saeed Mohammed; Imam Fadhel Al‑Sahlani, mwakilishi wa Marja’ mkubwa Ayatollah Sayyid Ali al‑Sistani Amerika ya Kaskazini; pamoja na Imam Mohammad Mardini, mwanzilishi wa American Muslim Center huko Michigan.
Askofu Mkuu Weisenburger alisifu roho ya maelewano ya kidini iliyoakisiwa katika taasisi hiyo mpya.
“Hakuna mahali ambapo ninahisi heshima, undugu na wema kama hapa,” aliwaambia waliohudhuria. “Tangu nilipoingia katika eneo hili zuri, nilihisi uwepo wa kina wa Mwenyezi Mungu.”
Alieleza kuwa msikiti huo ni mahali patakatifu patakapoimarisha mahusiano kati ya watu wa imani tofauti na kuimarisha uhusiano wao na Mungu.
“Nyumba ya jamii”
Danielle Elzayat, mwenyekiti wa Bodi ya Wakurugenzi ya IIOA, alisisitiza kuwa kituo hicho kipya ni zaidi ya jengo la kawaida.
“Leo si ufunguzi wa jengo tu,” alisema. “Ni ufunguzi wa nyumba yenu — nyumba ya ibada, elimu, huduma na jamii, ambako vizazi vijavyo vitajifunza, kukua, kuswali na kupata hisia ya kuwa sehemu ya jamii.”
Alikumbuka miaka ya mwanzo ya taasisi hiyo, ilipokosa eneo la kudumu, na kuwashukuru wajitolea, vijana, wafadhili na Klabu ya Wanawake kwa kuifanya ndoto hiyo kuwa uhalisia.
Viongozi wasisitiza huduma, utambulisho na mshikamano
Katika hotuba zao, viongozi walisisitiza kuwa thamani ya kweli ya msikiti haipo katika usanifu wake pekee bali katika huduma yake kwa wanadamu.
Abdul El‑Sayed alisema nyumba za ibada zinapaswa kuwa vituo vya kuwalisha wenye njaa, kuwasaidia walio dhaifu, kusimamia haki na kuimarisha mshikamano wa jamii.
Katika hotuba kuu ya jioni hiyo, Imam Sayyid Hassan Qazwini alitafakari safari ndefu ya mipango, uchangishaji wa fedha na ujenzi hadi kukamilika kwa mradi huo.
“Miaka minne iliyopita tulianza kujenga taasisi hii,” alisema. “Leo tunaona ndoto hiyo ikitimia kwa fadhila za Mwenyezi Mungu na ukarimu wa jamii hii.”
3497819
