Msahafu adimu wa Kazan waonyeshwa katika Jumba la Makumbusho la Makkah

IQNA – Wageni wanaotembelea Wilaya ya Utamaduni ya Hira huko Makkah wanapata fursa ya kushuhudia kito cha kielimu: Msahafu uliochapishwa mwaka 1906, uliopambwa kwa tafsiri na maelezo ya pembeni yenye ustadi wa hali ya juu.

Jumba la Makumbusho la Qur’an Tukufu lililoko katika Wilaya ya Utamaduni ya Hira linaonyesha mkusanyiko wa hazina adimu za Qur’an. Miongoni mwa yaliyopewa uzito wa pekee ni nakala mojawapo ya zamani zaidi iliyochapishwa ya Qur’an Tukufu, iliyotolewa katika mji wa Kazan, Shirikisho la Urusi, mwaka 1906 Miladia (1324 Hijria).

Msahafu unaoonyeshwa unatambulika kwa tafsiri zake za kielimu na tanbihi za pembeni, jambo linalodhihirisha juhudi za vizazi vya wanazuoni katika kufasiri aya za Qur’an na kubainisha maana zake kwa kina.

Jumba hilo la makumbusho, lililopo katika Wilaya ya Utamaduni ya Hira mjini Makkah, linajumuisha turathi adimu, hati za kale, na misahafu inayowakilisha hatua muhimu katika historia ya uandishi na uchapishaji wa Qur’an Tukufu. Aidha, linanufaika na teknolojia za kisasa za maonyesho zinazowasilisha maudhui ya kielimu na ya mwingiliano kwa wageni.

3498025