WFPIST yatoa wito wa kulindwa haki za Waislamu India
Katika taarifa iliyotolewa kufuatia marufuku ya hivi karibuni ya Hijabu katika jimbo moja la India, Hujjatul Islam wa Muslimin Dkt. Hamid Shahriari aliashiria heshima kwa taifa kubwa la India na kusema Waislamu ni sehemu isiyoweza kutenganishwa ya historia na adhama ya nchi hiyo ya Kusini mwa Asia.
Alibainisha kuwa Waislamu wa India wanajulikana kwa huruma, amani, kupenda utamaduni na kutetea uhuru na uhuru wa nchi yao.
Wamejitolea kwa mafundisho na mila zao za kidini kama walivyojitolea kwa mila zao za kitaifa, kasisi huyo alisema, na kuongeza kuwa haki zao zinapaswa kuheshimiwa na kulindwa.
Dkt/ Shahriari alisisitiza kuwa adhama na utukufu wa India unatokana na kuheshimu watu na kulinda haki za wafuasi wa dini na imani zote.
Akizungumzia marufuku ya hivi karibuni ya Hijabu na vikao vilivyofuata kuhusu suala hilo katika mahakama za India, alisema uamuzi wowote unaohusisha kupuuza haki za Waislamu utamaanisha changamoto mpya ya kuishi pamoja kwa amani katika nchi hiyo kubwa ya India.
Alitoa wito wa kutumia busara kutatua suala hilo kwa msaada wa wasomi na viongozi wa kidini.
Mzozo na hitilafu kuhusu vazi la hijabu katika vyuo vikuu na taasisi za elimu nchini India hususan katika jimbo la Karnataka ziliibuka hivi karibuni baada ya wafuasi wa chama tawala chenye misimamo mikali ya Kihindu cha BJP wanaotumia skafu za rangi ya zafarani kama nembo ya chama chao kuwazuia wanachuo wanawake na wasichana wa Kiislamu kuhudhuria masomo kwenye vyuo vikuu au watupilie mbali vazi lao la hijabu.
Baada ya kupamba moto mzozo baina ya pande hizo mbili maafisa wa Chuo Kikuu cha Karnataka ambao walikuwa wakinyemelea fursa ya kupiga marufuku vazi la staha la mwanamke wa Kiislamu, hijabu, waliamua kupiga marufuku skafu za rangi ya zafarani na hijabu ya wanawake wa Kiislamu. Hii ni licha ya kwamba, Katiba ya India inaruhusu uvaaji wa vazi la hijabu, lakini inaonekana kuwa chama tawala cha BJP kimeamua kutumia mbinu mpya ya kukanyaga haki hiyo ya Waislamu.
