Taarifa ya Hamas kwa mnasaba wa Siku ya Kimataifa ya Quds
Harakati ya Hamas imetangaza katika taarifa yake kwa mnasaba wa Siku ya Kimataifa ya Quds kwamba, kukombolewa Quds na Msikiti wa Al-Aqsa ni jukumu la Wapalestina wote na Umma mzima wa Kiislamu.
Hamas imeongeza katika taarifa hiyo kwamba, Siku ya Quds ni hafla ya kuukumbusha Umma wa Kiislamu na watu wote walio huru duniani kuhusu wajibu wao katika kutetea na kuulinda Msikiti wa Al-Aqsa na Al-Quds, ambavyo vinakabiliwa na ongezeko la mashambulizi na hujuma tangu ardhi ya Palestina ilipovamiwa na kukaliwa kwa mabavu.
Taarifa ya Hamas imeeleza kuwa, Siku ya Kimataifa ya Quds ni fursa ya kuunganisha juhudi za Umma katika kuunga mkono mapambano ya wakazi wa Quds, na imepongeza misimamo ya nchi zote na Umma wa Kiislamu na Kiarabu na vilevile watu huru ya kuendelea kutetea haki za taifa la Palestina na mapambano yake halali.
Hamas imesisitiza katika taarifa hiyo kwamba, mji wa Quds na Msikiti wa Al-Aqsa ndio kitovu cha mgogoro na adui Mzayuni; Adui anayeikalia kwa mabavu Palestina, anawaua kwa umati watu wa ardhi hiyo na kuwafukuza kutoka katika nchi yao na kutaka kuyayahudisha maeneo matakatifu.
Harakati ya Hamas imesema kuwa, Al-Quds na Msikiti wa Al-Aqsa zinasalia kuwa moyo unaodunda wa Palestina na Ulimwengu wa Kiislamu na ni nembo ya watu wote walio huru duniani. Taarifa ya Hamas imesisitiza kuwa, ni jukumu la watu wa matabaka yote na Umma wa Kiislamu kuikomboa Al-Quds na Msikiti wa Al-Aqsa kutoka kwenye makucha ya fashisti mtendajinai.
Harakati ya Hamas imesisitiza kuwa: "Tunatoa ahadi kwa taifa la Palestina ndani na nje ya nchi na katika kambi za wakimbizi wanaoendelea kutoa mhanga maisha yao kwa ajili ya kutetea ardhi, Quds na wafungwa wa Kipalestina, kwamba tutarejesha haki zao halali na kukidhi matakwa ya kuunda taifa uhuru ambalo mji mkuu wake utakuwa Quds Tukufu."
4133973
