Kituo cha Qur'ani cha Algeria kiko tayari kupokea wanafunzi kutoka nchi jirani

IQNA – Mkuu wa Msikiti wa Jamia wa Algiers amesema kuwa Kituo cha Dar-ul-Qur'an cha msikiti huo kiko tayari kupokea wanafunzi kutoka nchi jirani za Afrika.

Msikiti huo unapanga kuchukua hatua za kupokea idadi ya wanafunzi kutoka nchi jirani za Algeria, hasa kutoka eneo la Sahel barani Afrika, amesema Mohammed Al-Mamoun Al-Qasimi Al-Hassani, kama ilivyoripotiwa na gazeti la al-Ayyam.

Alitoa kauli hiyo wakati wa mkutano na Waziri wa Elimu ya Juu na Utafiti wa Kisayansi wa Mauritania, Mohamed El-Amine Ould Abi Cheikh El-Hadrami, aliyekuwa akizuru nchini Algeria.

Al-Hassani alijadili njia za kuimarisha ushirikiano na ubia wa kitaaluma kati ya taasisi za elimu ya juu za Mauritania na taasisi za kisayansi zilizo chini ya Msikiti Mkuu wa Algiers.

Alisema kuwa kupanua aina hii ya ushirikiano kutaimarisha uhusiano kati ya nchi hizo mbili.

Kituo cha Dar-ul-Qur'an ni sehemu ya Msikiti wa Jamia wa Algiers na ni moja ya taasisi zilizounganishwa na msikiti huu, kikiwa na malengo ya kutoa elimu ya kidini na isiyo ya kidini.

Kituo hiki, ambacho ni chuo cha juu cha masomo ya uzamili katika sayansi ya Kiislamu na kidini, kinapania kulea wanafunzi wa ngazi ya udaktari katika mihula minne ya kitaaluma, kwa sharti kuwa wamemaliza kozi ya kuhifadhi Qur'ani.

Fani za masomo zinazotolewa hapo ni pamoja na:

• Qur’ani Tukufu na Maarifa ya Kidini
• Qur’ani Tukufu na Mazungumzo ya Tamaduni na Ustaarabu
• Qur’ani Tukufu na Maarifa ya Imani na Tabia
• Bima ya Takaful (mfumo wa bima wa Kiislamu)
• Fintech (Teknolojia ya Fedha)
• Masoko ya Fedha ya Kiislamu
• Historia ya Sayansi na Hisabati
• Saikolojia ya Jamii kutoka Mtazamo wa Kiislamu
• Saikolojia ya Elimu
• Saikolojia ya Elimu kutoka Mtazamo wa Kiislamu
• Urithi wa Kimuundo
• Mipango na Maendeleo ya Miji

3491916