Ushauri wa Afya kwa Mahujaji

IQNA – Afisa wa afya kutoka Iran amesisitiza umuhimu wa kuzingatia kanuni za usafi na afya wakati wa safari ya Hija ili kuweza kunufaika vilivyo na safari hii ya kiroho.

Daktari Fatima Abedi amezungumza na  Shirika la Habari za Qur'ani la Kimataifa (IQNA) na kusema kuwa, katika kipindi cha Hija, kuzingatia kanuni za usafi ni changamoto, lakini ni jambo la msingi sana, kwani mafanikio ya safari hii yanategemea hali ya afya ya mwenye kuhiji.

Ameeleza kuwa moja ya masuala muhimu ya kiafya ni kuvaa mavazi yanayofaa kwa ajili ya Hija — mavazi ya rangi nyepesi, pamba yenye kuzuia joto, na yenye unene unaokubalika kwa mujibu wa mavazi ya Kiislamu.

Aidha, mavazi ya rangi nyepesi husaidia kupunguza mvuto kwa mbu aina ya Aedes, aliongeza. Tumia viatu vyepesi ambavyo tayari umeshavivaa kwa muda vinapendekezwa, pamoja na soksi za pamba za rangi nyepesi, alisema. Pia, ni vyema kubeba barakoa na tishu za karatasi kwa matumizi ya kibinafsi. Alipoulizwa kuhusu ugonjwa unaowapata Mahujaji kwa wingi na jinsi ya kuzuia, Daktari Abedi alisema mafua ya kawaida ndiyo ugonjwa unaojitokeza sana wakati wa safari ya Hija, na kuvumilia mafua katika mazingira ya joto kama ya Saudia huwa kugumu zaidi.

“Anga nje ya hoteli na maduka huwa na joto kali, lakini ndani ya majengo kuna hewa ya ubaridi. Vyumba vya hoteli huwa na viyoyozi, hivyo kwa wale wanaoathirika haraka na baridi—hasa ile ya viyoyozi—inashauriwa kubeba mavazi ya joto kama koti na kofia kwa ajili ya matumizi ndani ya hoteli.”

Watu wenye magonjwa ya njia ya hewa kama mafua na homa wanapaswa kukaa mbali na wengine na kuvaa barakoa wanapohudhuria mikusanyiko, alisisitiza.

Daktari Abedi aliongeza kuwa ili kujikinga na maradhi ya kuhara, Mahujaji wanapaswa kuepuka kula vyakula vilivyowekwa wazi kwenye jua au joto kali.

“Pia, inashauriwa mahujaji wapumzike wakati wa mchana ili kudumisha afya yao, kuchelewesha kutoka hotelini hadi jua litue, na kutoka tu kwa ajili ya ibada muhimu au shughuli zisizoweza kuahirishwa.”

Hija ni safari takatifu ya kuelekea mji mtakatifu wa Makka, ambayo ni wajibu kwa kila Mwislamu mwenye uwezo wa kimwili na kifedha kuitekeleza angalau mara moja maishani mwake.

Hija ya kila mwaka ni mojawapo ya nguzo tano za Uislamu, na ndiyo ibada kubwa zaidi ya pamoja duniani. Pia ni ishara ya umoja wa Waislamu na kujisalimisha kwao kwa Mwenyezi Mungu.

Zaidi ya Wairani 85,000 wanatarajiwa kutekeleza Hija mwaka huu, huku kundi la kwanza la mahujaji kutoka Iran tayari likiwa limewasili Makka kwa ajili ya Hija ya mwaka huu.

3493031