Mufti Mkuu wa India apongeza uamuzi wa mataifa kutambua Palestina

IQNA – Mufti Mkuu wa India, Sheikh Abubakr Ahmad, amepongeza uamuzi wa baadhi ya mataifa kutambua rasmi nchi huru ya Palestina.

Katika ujumbe wake, Sheikh Abubakr Ahmad alitaja uamuzi wa mataifa kama Ufaransa, Kanada, Uingereza, na mengine kadhaa, kuwa hatua ya maana inayotoa tumaini kwa watu wa Palestina waliokumbwa na mateso kwa muda mrefu. “Tunakaribisha kwa furaha tangazo hili lenye thamani kutoka kwa Serikali ya Uingereza na Jamhuri ya Ufaransa la kutambua rasmi nchi ya Palestina. Hili ni jambo la heri kwa watu waliodhulumiwa kwa muda mrefu katika harakati zao za uhuru na heshima ya kibinadamu,” alisema Sheikh Abubakr. Akaongeza kwamba, “Uamuzi huu, katika kipindi hiki kigumu, ni ishara ya kuamka kwa dhamiri ya kibinadamu, ushindi wa misingi ya haki, na kuthamini mateso ya watu wanaotamani maisha salama na yenye heshima chini ya anga ya nchi yao huru.” Mufti Mkuu wa India alieleza kuwa, “Sisi kutoka ardhi ya India na Darul Ifta, tunaupokea msimamo huu kwa mikono miwili na tunawapongeza wale wote wanaosimama na haki ya Wapalestina. Tunasisitiza kuwa kuitambua Palestina kama taifa huru na lenye mamlaka kamili ni hatua yenye baraka katika njia ya haki, na mwanzo wa safari ya amani ya kweli ambayo kila mtu huru huitafuta.” Alitoa wito pia kwa mataifa yote ya Kiislamu na wanadamu kwa ujumla kuiga mfano huo, na kuhitimisha mateso ya taifa hilo linalopambana, pamoja na kusimama kidete dhidi ya mashine ya dhulma na uonevu ambayo bado inaendelea kumwaga damu ya wasio na hatia huko Gaza na maeneo mengine ya Palestina. “Tunamuomba Mwenyezi Mungu awapatie watu wa Palestina faraja na ushindi, na dunia kwa ujumla amani na usalama. Alhamdulillah, Mola wa walimwengu wote. Rehema na amani zimshukie Mtume wetu Muhammad (SAW), pamoja na ahli zake na maswahaba wake wote,” alihitimisha Sheikh Ahmad. Waziri wa Mambo ya Nje wa Ufaransa, Jean-Noel Barrot, alitangaza kupitia mtandao wa X kuwa mawaziri wa nchi 15 walitoa tamko la pamoja baada ya mkutano uliofanyika mjini New York, ukiongozwa kwa pamoja na Ufaransa na Saudi Arabia. “Nchini New York, pamoja na mataifa mengine 14, Ufaransa inatoa wito wa pamoja: tunatamka nia yetu ya kuitambua nchi ya Palestina na kuwataka wale ambao hawajafanya hivyo kuungana nasi,” aliandika Barrot. 4297739