Al-Jawahir ya Sheikh Tantawi ni mapinduzi katika Tafsiri ya Qur'ani
Katika tafsiri yake ya Qur'ani Tukufu, anaeleza kuhusu hukumu zinazohitajika na Waislamu na mafundisho ya Qur'ani kuhusu maadili.
Sifa muhimu zaidi ya tafsiri hii, hata hivyo, ni mtazamo wake wa kisayansi na kulinganisha baadhi ya aya 750 za Quran Tukufu na uvumbuzi katika sayansi ya asili.
Tantawi alizaliwa mwaka 1861 katika kijiji cha Kafr Awazallah katika Jimbo la Sharqia nchini Misri.
Alisoma katika Chuo cha Kiislamu cha Al-Aazhar kwa miaka mitatu lakini ikabidi aondoke kituoni kutokana na ugonjwa wa baba yake.
Baadaye alisoma katika Dar al-Ulum (chuo cha sayansi) nchini Misri ambapo sayansi ya kisasa ilifundishwa na baadaye akawa mwalimu wa kwanza wa falsafa ya Magharibi katika eneo lake.
Inasemekana baada ya kuona treni kwa mara ya kwanza, alianza kujiuliza ni vipi wanadamu wameweza kutengeneza uvumbuzi huo na kwanini Waislamu wameshindwa kufikia kiwango hicho cha sayansi.
Alisoma kuhusu historia, falsafa na maendeleo ya kisayansi katika nchi za Magharibi na historia ya sayansi kama vile dawa, famasia na unajimu.
Kazi kuu ya Tantawi ni Al-Jawahir fi Tafsir al-Quran al-Karim ambayo aliiandika katika juzuu 26.
Katika tafsiri hii, amenufaika na tafsiri za Qur'ani zilizoandikwa kabla na katika baadhi ya sehemu zake.
Lakini hatua yake kuu ya kibunifu na ya kimapinduzi ilikuwa ni kufanya marejeo ya uvumbuzi wa kisayansi wa Ulaya na maendeleo ya saikolojia na sosholojia katika kufasiri maneno, sentensi na aya za Qur'ani Tukufu.
Taathira ya mapinduzi hayo bado inadhihirika huku baadhi wakisema yalitikisa sekta ya kielimu na Fiqhi nchini Misri na nchi nyingine za ulimwengu wa Kiislamu.
Sheikh Tantawi alisema alichagua mbinu hii ili kuongeza ufahamu na kuhimiza vijana wa Kiislamu kujifunza sayansi kama vile unajimu, tiba, fizikia, jiolojia, na sayansi nyinginezo.
Anabainisha kuwa idadi ya aya za Quran zinazozungumzia ibada ni 150 tu katika hali ambayo kuna aya 750 zinazowaalika wanadamu kutafakari na kuwaza juu ya ulimwengu na maumbile.
Kwa ujumla, tafsiri yake ina dhamira kuu kadhaa: kujadili masuala ya Fiqhi (kisheria) katika kila aya, masuala yanayohusiana na pepo na moto, kheri na shetani, uchunguzi wa kihistoria na kimaadili, na kusoma aya kwa kuangalia sayansi ya kimaumbile na ya kimaadili.
