Kuwait yasambaza Tafsiri za Qur'ani misikitini kuhudumia wafanyakazi wa kigeni
Kwa mujibu wa ripoti, rafu 600 zenye nakala za Qur'ani zilizotafsiriwa ziliwekwa katika misikiti 547 katika majimbo ya Ahmadi, Hawalli, na Mubarak Al-Kabeer.
“Mradi huu ulitekelezwa kwa awamu mbili kwa msaada wa Mamlaka Kuu ya Wakfu,” amesema Ammar Al-Kandari, Mkurugenzi Mkuu wa Kamati ya Uwasilishaji wa Uislamu. “Kila rafu ya maktaba iligharimu dinari 100 za Kuwait, na gharama yote ya kusambaza rafu 600 ilikuwa dinari 60,000.”
Al-Kandari ameeleza kuwa awamu ya kwanza ya mradi ilikamilika mwezi Novemba mwaka jana, huku awamu ya pili ikitekelezwa mwezi Machi mwaka huu. Kila awamu ilihusisha usambazaji wa rafu 300.
Aliongeza kuwa, “Tafsiri za Qur'ani zilipatikana kwa lugha ya Kiingereza, Kiurdu, Kinepali, Kitamil, Kihindi, na Kibengali.”
Mpango huu umekuja kama jibu kwa wakazi wa Kuwait wanaozungumza lugha mbali mbali. Idadi kubwa ya wakazi wa Kuwait inajumuisha wafanyakazi wa kigeni. Kwa mujibu wa takwimu kutoka Mamlaka ya Umma ya Taarifa za Kiraia (PACI), wahamiaji wanaunda karibu asilimia 70 ya jumla ya watu wapatao milioni 4.7 wanaoishi nchini Kuwait.
Wengi wa wahamiaji hawa wanatoka Kusini mwa Asia, wakiwemo kutoka India, Bangladesh, Pakistan, na Nepal—nchi ambazo lugha zilizotajwa hapo juu huzungumzwa kwa wingi.
3492770
