Msomi: Hija inaleta manufaa ya kiroho, kisiasa na kijamii kwa Waislamu wote

IQNA – Mbunge wa zamani wa Iran ameielezea Hija kama ibada ya kiroho yenye malipo makubwa, lakini pia yenye manufaa mapana ya kisiasa na kijamii kwa Waislamu kote duniani.

Hujjatul-Islam Mohammad Taghi Rahbar aliiambia IQNA kuwa: “Hija ina roho ya kimaanawi na pia ina mwelekeo wa kisiasa, na ni alama ya umoja wa jamii za Kiislamu.”

Akaongeza: “Kwa maneno mengine, manufaa ya hija hayawahusu tu wale wanaohudhuria, bali yanawafikia pia wasioweza kuhudhuria, kama ilivyosemwa katika Qur’ani Tukufu: ‘Na watangazie watu kuhusu Hija’,” akinukuu aya ya 27 ya Surah Al-Hajj.

Rahbar alieleza kuwa Mahujaji wanapotekeleza ibada ya hija, hufanya hivyo kwa lengo la kuimarisha imani ya pamoja ya kuamini Umoja wa Mwenyezi Mungu na kuinuka kiroho. “Hata wale wasioshiriki moja kwa moja katika Hija hunufaika kwa njia za kiuchumi na kimali kutokana na harakati ya mahujaji,” alisema. “Kwa hivyo, baraka za safari hii ya kiroho huwafikia watu wote.”

Alisisitiza umuhimu mpana wa hija kwa kusema: “Mwelekeo wa kisiasa wa hija unahusisha kuimarisha umoja wa Waislamu, kuamsha mwamko wa Kiislamu, kurejea katika Uislamu wa kweli, Qur’ani na Mtume Mtukufu (SAW), na kuimarisha utambulisho wa Kiislamu.”

Rahbar pia alielezea hija kama fursa ya Waislamu kuonyesha mshikamano wao mbele ya dhulma na uonevu duniani. “Waislamu wanaweza kutumia Hija kuonyesha umoja na mshikamano wao dhidi ya dhulma na kiburi cha kimataifa,” alisema.

Alisema kuwa hija pia inagusa masuala ya uongozi na utawala katika ulimwengu wa Kiislamu, na kuimarisha uhusiano kati ya wanazuoni na wasomi wa Kiislamu.

Alisisitiza kuwa hija ya mwaka huu inapaswa kuwa jukwaa la kuunga mkono watu wanaokandamizwa, hususan Wapalestina wa Gaza. “Hija lazima ibebe roho ya kuwatetea watu wanaodhulumiwa wa Gaza na kufichua uovu wa Wazayuni,” alisema Rahbar.

“Mwaka huu, fursa mbalimbali na ibada ya kujitenga na makafiri zitumike kuwatetea watu wa Palestina na kulaani wahalifu,” aliongeza.

Alihitimisha kwa kutoa wito kwa Umma wa Kiislamu duniani kutumia mkusanyiko wa Hija “kuufikisha ujumbe wa watu wa Palestina wanaodhulumiwa kwa ulimwengu mzima.”

Hija ni wajibu angalau mara moja maishani kwa kila Muislamu mwenye uwezo wa kimwili na kifedha wa kuitekeleza.

Ibada hii huvuta mamilioni ya Waislamu kila mwaka katika maeneo matakatifu ya Saudi Arabia, ikiwa ni tendo kuu la ibada na pia uzoefu wa pamoja unaovuka mipaka ya kitaifa na kiutamaduni.

3493086