Simulizi ya Vita ya Kukata Tamaa dhidi ya Mtazamo wa Mchakato Unaofungua Fursa

IQNA – Aya za Qur’ani Tukufu zinazohusu Vita vya Uhud katika Surah Aal Imran zinalenga kuwahamisha Waislamu kutoka katika mtazamo uliotawanyika unaoangalia historia kama matukio yaliyokatika katika, na kuwapeleka kwenye uelewa wa kimchakato wa sunna na sheria za Mwenyezi Mungu.

Kwa njia hii, simulizi ya vita inayoweza kuzaa kukata tamaa hubadilishwa kuwa mtazamo unaokuza matumaini na kufungua milango ya fursa.

Baada ya Vita vya Uhud, karibu kila nyumba katika Madina ilikuwa na athari za walioumia na waliopata shahada. Hata hivyo, Aya ya 137 ya Surah Aal‑Imran haisimami sana kuchambua tukio la vita lenyewe; bali inalenga kubainisha mtazamo mpana wa maisha na historia. Aya inaanza kwa kusema:

“Zimepita kabla yenu sunna na njia za Mwenyezi Mungu. Basi tembeeni katika ardhi muone ulikuwaje mwisho wa wale waliokanusha.”

Kisha inaendelea kwa kusema:

“Wala msilegee, wala msihuzunike; na nyinyi ndio mtakaokuwa juu ikiwa nyinyi ni Waumini wa kweli.”

Yaani, msilegee katika kutii amri za Mwenyezi Mungu wala katika kujitahidi dhidi ya adui; wala msihuzunike kwa sababu ya majaribu na misukosuko inayowapata. Ikiwa nyinyi ni Waumini, basi hadhi yenu iko juu mbele ya Mwenyezi Mungu.

Kwa kawaida, kila vita huambatana na wasiwasi, maumivu na mashaka. Ndiyo maana Qur’ani inaongeza kwa kusema:

“Ikiwa jeraha limewapata nyinyi, basi jeraha kama hilo limewapata pia wale wengine (maadui zenu).”

Hali hii ni kama mkimbiaji anayehisi uchovu, lakini akagundua kuwa nguvu za washindani wake pia zinapungua. Mtazamo wa muda mfupi wa wakati unaweza kumpelekea mtu ama kukata tamaa au kujivuna. Ndiyo maana Qur’ani inaonya:

“Wala asikudanganyeni mdanganyifu kuhusu Mwenyezi Mungu.”

Suluhisho linalotolewa hapa ni mwito wa kubadilisha mtazamo kutoka kuangalia tukio la papo kwa papo kwenda kwenye kuona mambo kwa upeo wa mchakato mpana. Ili mtu aone sunna ya Mwenyezi Mungu katika historia, ni lazima apanue upeo wa mtazamo wake. Mtazamo wa kimchakato hauzalishi tena kukata tamaa, bali huzaa matumaini na kufungua fursa mpya.

Qur’ani inaendelea kutangaza:

“Na siku hizi tunazizungusha baina ya watu.”

Maana yake ni kwamba Mwenyezi Mungu huzigeuza siku za ushindi na dhiki miongoni mwa wanadamu. Mzunguko wa faraja na mitihani katika jamii ni sehemu ya sunna ya Mwenyezi Mungu: wakati mwingine hujitokeza katika mapambano ya ndani kati ya imani na ushawishi wa Shetani ndani ya jamii, na wakati mwingine huonekana katika mpangilio wa ulimwengu mzima, hata katika kipindi cha karne nyingi.

3496735