Wanawake wa Yemen wakamilisha Kusoma Qur’ani Tukufu yote kwa siku moja

IQNA – Mji wa Aden, Yemen umeshuhudia hafla adhimu ya Qur’ani Tukufu iliyowaleta pamoja wanawake waliobobea katika hifdhi, ambapo walifanikiwa kuisoma Qur’ani Tukufu yote kwa kuhifadhi (kwa moyo) ndani ya kikao kimoja.

Kwa mujibu wa Yemen Monitor, programu hii ya kuhitimisha Qur'ani Tukufu iliandaliwa siku ya Jumamosi na 'Jumba la Qur'ani la Aden'. Hafla hiyo imefanyika kwa mwaka wa tatu mfululizo, ikiwashirikisha wanawake 50 mahafidh wa Qur’ani.

Tukio lilianza majira ya saa kumi na mbili alfajiri hadi saa kumi na mbili jioni, ambapo washiriki walikamilisha usomaji mzima wa Qur’ani kwa hifdh, wakionyesha uthabiti, subira na mapenzi yao kwa Kitabu cha Mwenyezi Mungu.

Bi. Alfat Abdo, mkurugenzi wa taasisi hiyo na mwalimu wa Qur’ani, aliwapongeza washiriki kwa mafanikio hayo adhimu, akisisitiza azma yao ya kuhitimisha Qur’ani yote kwa kuhifadhi kuwa ni jambo la kipekee na lenye baraka. Aidha, aliwatakia kuendelea na mafanikio na kudumu katika njia ya Qur’ani.

Naye Umm Ahmed, mmoja wa walimu walioshuhudia hafla hiyo, alieleza kuwa muda huo haukuwa tu wa tilawa, bali ulikuwa ni nyakati za kiroho zilizojaa unyenyekevu, khushuu na hisia za ndani. Aliongeza kuwa kushuhudia umahiri huo wa kuhifadhi Qur’ani ni fahari kubwa na chemchemi ya matumaini, na ni dalili ya juhudi zilizo na baraka katika kufundisha Kitabu cha Mwenyezi Mungu.

Hafla hii imeacha athari njema katika nyoyo za wengi, ikidhihirisha nafasi ya wanawake katika kuhifadhi na kueneza elimu ya Uislamu, hasa katika jamii za Kiislamu za pwani ya Afrika Mashariki ambako mila na desturi za dini zimejikita kwa kina.

4350204