Mataifa ya Kiislamu yatangaza Siku za Idul-Adha

IQNA-Zaidi ya Waislamu milioni 2 wamewasili Saudi Arabia kutekeleza ibada ya Hija mjini Makka mwaka huu huku nchi za Kiislamu pia zikitangaza tarehe ambazo zitaadhimisha siku kuu ya Idul Adha katika mwaka wa 1445 Hijria Qamari (2024 Miladia).

Hija ambayo ni moja ya mikusanyiko mikubwa zaidi ya kidini ulimwenguni mwaka huu imerejea katika  uwezo wake kamili kwa mara ya kwanza tangu kuanza kwa janga la coronamiaka mitatu iliyopita.

Hija ni moja ya nguzo tano za Uislamu, na Waislamu wote wenye uwezo wa kimwili na kimali wanatakiwa kuhiji angalau mara moja katika maisha yao.

Saudi Arabia imetangaza kuwa, siku ya kwanza ya mwezi wa Dhul-Hijjah ilikuwa Juni 7, na hivyo Jumamosi, Juni 15 itakuwa siku ya Arafah, na Jumapili Idul al-Adha.

Tangazo hili liliungwa mkono na mamlaka za kidini za Misri, Jordan, Palestina, UAE, Tunisia, Algeria, na Libya.

Kwingineko Jamhuri ya Kiislamu ya Iran, Indonesia, Malaysia, Brunei, India na Oman pamoja na nchi kadhaa za Afrika zikiwemo Morocco, Mauritani  zimetangaza kuwa, kwa kutegemea mwandamo wa mwezi,  Jumatatu, Juni 17 itakuwa ni siku kuu ya Idul Adha.

Ofisi ya Ayatullah Seyyed Ali Sistani nchini Iraq nayo imetangaza kuwa Jumamosi ilikuwa ya kwanza ya mwezi wa Dhul-Hijjah, 1445 Hijria, na hivyo Idul Adha itakuwa tarehe 17 Juni.

3488703