Wanafunzi na Walimu wa Qur’an Waheshimiwa Nchini Qatar
Wizara ya Wakfu na Masuala ya Kiislamu ya Qatar (Awqaf), kupitia Idara ya Da’wah na Miongozo ya Kiislamu, iliandaa hafla hiyo ambayo iliwatunuku wanafunzi mahiri pamoja na wahitimu kutoka vituo vya elimu ya Qur’an kwa miaka ya 2023 na 2024, kwa kutambua mafanikio yao ya kipekee.
Hafla hiyo ilifanyika katika Msikiti wa Imam Muhammad bin Abdul Wahhab chini ya udhamini wa Waziri wa Wizara ya Wakfu na Masuala ya Kiislamu, Mheshimiwa Ghanem bin Shaheen Al Ghanim, na kwa uwepo wa Katibu Mkuu wa Wizara hiyo, Sheikh Khalid bin Mohammed bin Ghanem Al-Thani.
Wakati wa hafla hiyo, wanafunzi 603 kutoka ngazi mbalimbali, kuanzia ngazi za msingi hadi wale waliokamilisha kuhifadhi Qur’an yote, walienziwa. Sambamba nao, wakuu 15 wa vituo vya Qur’ani pamoja na walimu 100 waliotajwa kuwa bora pia walitunukiwa, kama ishara ya kuthamini juhudi zao katika kuutumikia Kitabu cha Allah na kuendeleza elimu ya Qur’ani.
Hafla ilipambwa na tilawa tukufu kutoka kwa wanafunzi wa viwango tofauti, kisha hotuba kutoka kwa Mkurugenzi wa Idara ya Da’wah, Jassim bin Abdullah Al Ali. Katika hotuba yake, alisisitiza kuwa tukio hili ni ushahidi wa dhamira ya Wizara katika kuwaenzi wahifadhi wa Qur’ani na kuimarisha nafasi ya vituo vya Qur’ani kama taasisi za elimu na malezi, vinavyosaidia kulea kizazi chenye maarifa, maadili, na utambulisho wa Kiislamu.
Alimnukuu Mtume Muhammad (Rehma na Amani ziwe juu yake), aliyesema:
"Bora wenu ni yule anayejifunza Qur’an na kuifundisha."
Al Ali pia alielezea mafanikio yaliyopatikana ndani ya miaka miwili iliyopita kupitia Idara ya Qur’an na Sayansi Zake, ikiwemo wahitimu 181 waliokamilisha kuhifadhi Qur’ani yote, na wanafunzi 422 wa Kiqatari waliopanda viwango vya juu vya hifdh, huku 92 kati yao wakijiunga na Kituo cha Al-Noor kwa elimu ya Qur’ani ya kiwango cha juu.
Aidha, alitaja mipango mingi ya kielimu na burudani iliyotolewa kwa ajili ya kuwahamasisha wanafunzi wanaohudhuria vituo hivyo.
Wakati wa hafla hiyo, pia kulionyeshwa video maalum iliyobeba takwimu mbalimbali juu ya maendeleo ya vituo vya Qur’ani. Idadi ya vituo imeongezeka kutoka 132 mwaka 2023 hadi 148 mwaka 2024, ambapo 116 kati ya hivyo vinafadhiliwa na Wizara, na 32 vinaendeshwa kwa michango binafsi.
Zaidi ya hayo, darsa 28 za kusoma Qur’ani zimefanyika misikitini, zikisimamiwa na maimamu na waadhini 1,016 waliobobea.
Takwimu zilionyesha kuwa idadi ya wanafunzi waliopo kwenye vituo vya Qur’ani ilifikia takriban 18,994 mwaka 2024, wakiwemo wanafunzi 2,249 wa Kiqatari. Wanafunzi waliokamilisha kuhifadhi Qur’ani nzima waliongezeka kutoka 58 mwaka 2023 hadi 123 mwaka 2024.
Wizara ya Wakfu imeeleza kuwa itaendelea kuimarisha mazingira rafiki ya kujifunzia Qur’ani katika vituo vyake, pamoja na kuyapa vifaa vya kisasa vya kufundishia, kwa lengo la kusaidia kuhifadhi Qur’ani Tukufu na kusambaza maadili yake mema, kwa mujibu wa dira ya taifa la Qatar ya kuendeleza Uislamu wa huruma na upendo.
3493632
