Mufti Mkuu wa India Ahamasisha Saumu a Kuomba Dua kwa Ajili ya Gaza
Sheikh Abubakr Ahmad ametoa wito kwa maimamu wa misikiti katika maeneo mbalimbali ya nchi kuandaa makusanyiko ya dua na maombi maalumu katika usiku wa Jumatatu, tarehe 11 Agosti, na kufunga siku hiyo kwa nia ya kuwasaidia Waislamu wa Gaza na kupunguza mateso na matatizo yao.
Katika tamko lake akijibu uamuzi wa baraza la mawaziri la Israel wa kuidhinisha mpango wa kuikalia kwa mabavu Ukanda wa Gaza, alieleza kuwa uamuzi huo ni uvunjaji wa wazi wa mikataba yote ya kimataifa na sheria za kibinadamu, na ni muendelezo wa sera za kikatili za utawala wa Kizayuni za kuangamiza taifa lisilo na ulinzi kutoka ardhi yake iliyokaliwa kwa mabavu.
Amesema kuwa utawala wa Kizayuni umeendelea na mauaji ya kinyama dhidi ya watoto na wanawake wa Kipalestina kwa takriban miezi 22, na kwamba vitendo hivyo vimefuatia sera za njaa, uhamisho wa kulazimishwa, na kuongezeka kwa idadi ya Wapalestina waliouawa hadi zaidi ya 65,000 tangu tarehe 7 Oktoba 2023.
Ameuita uamuzi wa baraza la mawaziri la Israel wa kuikalia Gaza kuwa ni sera ya uvamizi isiyo na uhalali wowote, inayodhihirisha mipango ya muda mrefu ya kuongeza mateso ambayo zaidi ya watu milioni mbili wa Gaza wanayapitia.
“Katika mazingira haya magumu, naiomba Umma wa Kiislamu kusimama kwa ikhlasi mbele ya Mwenyezi Mungu kuziombea dua ndugu zetu wa Gaza, na pia nawaomba Waislamu wa India waombe dua majumbani mwao usiku wa Jumatatu, tarehe 11 Agosti 2025, baada ya Swala ya Magharibi, na wafunge siku hiyo kwa nia ya kuunga mkono ndugu zetu wa Palestina na kupunguza mashaka yao,” amesema Sheikh Abubakr Ahmad.
“Namuomba Mwenyezi Mungu Mtukufu aondoe dhiki na mashaka ya watu wa Palestina, awapatie njia ya kutoka kwenye mateso yao, na awape ushindi dhidi ya waliowadhulumu. Yeye ndiye Mola Bora na Msaidizi Bora.”
Utawala wa Kizayuni, katika kikao cha saa 10 cha baraza la kisiasa na usalama kilichodumu kuanzia Alhamisi jioni hadi Ijumaa asubuhi (tarehe 7 na 8 Agosti), uliidhinisha kukaliwa kwa mji wa Gaza na kupanuliwa kwa operesheni za kijeshi katika Ukanda wa Gaza, jambo linalomaanisha kuondolewa kwa nguvu kwa Wapalestina kutoka Jiji la Gaza.
Waziri mkuu wa Israel, Benjamin Netanyahu, aliambia Fox News kabla ya kikao hicho kwamba utawala wake unalenga “kudhibiti kikamilifu eneo lote la Gaza.”
Uamuzi huu umelaaniwa na makundi ya upinzani ya Kipalestina, taasisi na mashirika ya Kiislamu, pamoja na nchi mbalimbali duniani.
/3494199
