Msomi: Qurani Tukufu ni Katiba Kamili ya Maisha ya Kiuchumi, Kitamaduni na Kisiasa

IQNA-Sheikh Mamosta Fayeq Rostami, msomi maarufu wa Ahul Sunna na mwakilishi wa watu wa Kurdistan katika Baraza la wanazuoni Wataalamu wanaomchagua Kiongozi Muadhamu wa Iran amesisitiza kuwa Qurani Tukufu si tu kitabu cha ibada, bali ni waraka kamili unaoelekeza maisha ya binadamu katika nyanja za uchumi, utamaduni na siasa

Akizungumza katika ufunguzi wa mashindano ya 48 ya kitaifa ya Qur'ani ya Iran, yaliyofanyika katika Ukumbi wa Utamaduni wa Fajr, Sanandaj, Sheikh Rostami alisema: “Kuitukuza Qur'ani ni kuinama mbele ya chemchemi ya hekima, rehema, tiba na mwongozo wa maendeleo ya mtu binafsi na jamii.”

Alinukuu mwanafalsafa wa kigeni aliyesema kuwa licha ya kusoma maelfu ya vitabu, hakuna kilichomvutia kama Qur'ani, akiamini kuwa si maneno ya binadamu wala majini, bali ni mwaliko wa kimungu kuelekea haki, huruma na ustawi wa maisha ya mwanadamu.

Sheikh Rostami pia alikumbusha maneno ya Mtume Muhammad (S.A.W): “Mioyo hupata kutu kama chuma, na Qur'ani ndiyo inayoisafisha na kuiletea amani.” Alisema Qur'ani ni nuru inayowaongoza wanadamu kutoka gizani hadi kwenye baraka na utulivu wa kiroho.

Alihitimisha kwa kusema kuwa Qur'ani ni chanzo cha heshima na hadhi ya binadamu, na kama alivyonukuliwa Imam Ali (A.S) kutoka kwa Mtume (S.A.W): “Mwenyezi Mungu aliteremsha Qur'ani ili dunia ing’ae kwa mwangaza wake, na wanadamu watoke gizani hadi kwenye rehema na nuru ya kimungu.”

Mashindano haya ya kitaifa ya Qur'ani, yanayoandaliwa na Shirika la Awqaf na Masuala ya Hisani, ni tukio kubwa zaidi la Qur'ani nchini Iran, yakikusanya washiriki kutoka kote nchini kushindana katika usomaji, hifadhi, Tarteel na Adhana. Washindi wa juu huwakilisha Iran katika mashindano ya kimataifa ya Qurani.

3495057