Mashindano ya 13 ya Kitaifa ya Qur’ani ya Mauritania yaanza Jijini Nouakchott

IQNA – Mashindano ya 13 ya kitaifa ya kuhifadhi na kusoma Qur’ani nchini Mauritania yameanza rasmi siku ya Jumamosi katika mji mkuu, Nouakchott.

Mashindano hayo yameandaliwa kupitia juhudi za Idhaa ya Mauritania kwa uungwaji mkono wa Rais wa Mauritania, Mohamed Ould Cheikh Al-Ghazouani.

Tukio hilo linasimamiwa na Waziri wa Masuala ya Kiislamu na Elimu, Ould Sidaty Ould Ahmed Loly, pamoja na Waziri wa Utamaduni na Sanaa, Hussein Ould Medou.

Mashindano hayo yana vipengele vitatu: kuhifadhi Qur’ani Tukufu yote kwa washiriki walio chini ya umri wa miaka 35; kuhifadhi nusu ya Qur’ani kwa kundi la walio chini ya miaka 18; na kuhifadhi robo ya Qur’ani kwa kundi la watoto walio chini ya miaka 12.

Jumla ya wasomaji 16 wa kike wa Qur’ani wanashiriki katika mashindano hayo. Aidha,  maqari na walimu wa Qur’ani walihudhuria hafla ya ufunguzi.

Kwa mujibu wa waandaaji, zawadi nono za fedha zitatolewa kwa washindi mwishoni mwa mashindano.

Akizungumza katika hafla ya ufunguzi, Mkurugenzi wa Idhaa ya Mauritania, Mohamed Abdelkader Ould Eladah, alieleza malengo na maudhui ya mashindano hayo, mpangilio wake na hatua mbalimbali zitakazofuatwa, akisisitiza kuwa mashindano hayo yana mchango mkubwa katika kuhamasisha wasomaji wa Qur’ani na kuimarisha nafasi ya Kitabu Kitukufu katika jamii.

Kwa upande wake, Waziri wa Masuala ya Kiislamu na Elimu alisema tukio hilo linaakisi dhamira ya rais katika kuhudumia Qur’ani na wahudumu wake, akawashukuru waandaaji na kuwatakia washiriki mafanikio.

Habari inayohusiana:

• Mashindano ya Kwanza ya Kimataifa ya Qur'ani na Sunna Afrika Magharibi nchini Mauritania

Naye Waziri wa Utamaduni na Sanaa alibainisha ongezeko kubwa la idadi ya washiriki, akisema jumla ya watu 2,434 wameshiriki katika mashindano hayo, huku wanawake wakichukua nafasi muhimu. Aliongeza kuwa huu ni mwaka wa pili kwa kamati maalumu za majaji kwa washiriki wanawake kuanzishwa.

4331547