Kuibua Vipaji na Imani: Mashindano Maalum ya Qur'ani kwa Wenye Usonji nchini Libya

IQNA – Mashindano maalum ya Qur'ani yaliyobuniwa mahsusi kwa watu wenye usonji wa Down yamefanyika kwa mafanikio makubwa mjini Benghazi, Libya, yakilenga usomaji wa Qurani, hifadhi ya Qurani, na Adhana.

 Usonji ni ugonjwa wa unaoathiri uwezo wa mtu kujifunza ambao Kiingereza unajulikana kama Down Syndrome.

Hafla hiyo ya kipekee ya kiroho na kibinadamu iliandaliwa na Jumuiya ya Marafiki wa Watu wa Azma, na ilijikita katika kuonesha uwezo wa washiriki katika kuhifadhi na kusoma Qur'ani Tukufu pamoja na Adhana, katika mazingira yaliyojaa heshima, fahari na kuthamini nafasi yao katika jamii.

Shughuli za mashindano zilianza kwa ushiriki mpana, ambapo washiriki 62 wenye usonji  walishiriki. Walionesha mifano ya kutia moyo ya usomaji sahihi, matamshi fasaha, na sauti nzuri zenye unyenyekevu wa kiroho katika utoaji wa Adhana.

Kupitia mpango huu, jumuiya hiyo ililenga kuinua kujiamini kwa watu wenye usonji  na kuangazia uwezo wao wa kiakili na kiroho, ikisisitiza kuwa ulemavu hauzuii ubunifu wala uhusiano wa karibu na Kitabu cha Mwenyezi Mungu. Aidha, mashindano hayo yaliunda mazingira chanya ya ushindani kwa familia na wataalamu waliokuwepo.

Akizungumza na Shirika la Habari la Libya, mwenyekiti wa jumuiya hiyo, Mohamed Said Al-Warfali, alisema kuwa mashindano hayo ni sehemu ya mpango wa kila mwaka wa jumuiya hiyo unaolenga kuwawezesha watu wa azma. Alibainisha kuwa lengo kuu ni kuangaza vipaji vya kipekee vya watoto hawa, akisisitiza kuwa ustadi wa usomaji ulioshuhudiwa siku hiyo uliwasilisha ujumbe wa upendo na amani kwa jamii nzima.

Vigezo vya tathmini vilihusisha makundi kadhaa. Kundi la kwanza lilihusu hifadhi ya sura fupi kwa washiriki wanaoanza, likizingatia ubora wa kuhifadhi na urahisi wa matamshi. Kundi la pili lililenga usomaji na uimbaji wa Qur'ani kwa wenye sauti nzuri, likitathmini uzuri wa sauti, kujiamini, na unyenyekevu.

Kundi la tatu lilihusu utoaji wa Adhana kwa washiriki wenye vipaji vya sauti, likizingatia nguvu ya sauti, matamshi sahihi, na kufuata mpangilio unaotakiwa.

Mashindano hayo yalihitimishwa katika hali ya furaha na shukrani, yakisherehekea juhudi zilizofanywa na kusisitiza umuhimu wa mipango kama hii katika kuimarisha nafasi ya watu wa azma ndani ya jamii, pamoja na kuonesha uwezo wao na mchango wao muhimu katika nyanja za kidini na kibinadamu.

3496353