Mufti wa Al-Quds aonya dhidi ya kusambazwa kwa nakala ya Qur’ani Iliyo na hitilafu ya uchapaji

IQNA – Mufti Mkuu wa Al-Quds na ardhi za Palestina ameonya kuhusu kusambazwa kwa nakala ya Qur’ani Tukufu yenye hitilafu ya uchapaji katika aya moja.

Sheikh Muhammad Hussein, ambaye pia ni Mwenyekiti wa Baraza Kuu la Fatwa, amesema kuwa nakala hiyo ina hitilafu ya uchapaji, kwa mujibu wa taarifa ya Nabz.

Katika taarifa yake kwa vyombo vya habari, alifafanua kuwa hitilafu hiyo imo katika ukurasa wa 354, kwenye Aya ya 33 ya Surah An-Nur, ambako neno “Yughnihim” (Yeye huwatajirishia) limeandikwa vibaya kutokana na kukosekana nukta chini ya herufi ya.

Amesema kuwa hili ni kosa la uchapaji linalohitaji kutambuliwa na kurekebishwa mara moja.

Amebainisha kuwa toleo hilo lilichapishwa na Dar Ihyaa al-Turath al-Arabi mjini Beirut, na kusisitiza kuwa makosa kama haya, hata kama hayakulengwa, ni mazito sana kutokana na utukufu wa Qur’ani Tukufu na wajibu wa kulinda usahihi wake na usafi wake wa kihistoria.

Sheikh Muhammad Hussein ametoa wito kwa maktaba, vituo vya uchapaji, na wananchi waliolipata toleo hilo kulipeleka kwa Baraza Kuu la Fatwa mara moja ili hatua zinazofaa zichukuliwe kwa mujibu wa taratibu rasmi, na kuhakikisha kwamba usambazaji wa toleo hilo unasitishwa.

Amesisitiza umuhimu wa uangalifu wa hali ya juu na uhakiki makini wakati wa uchapaji wa nakala za Qur’ani, hususan ikizingatiwa kuwa baadhi ya nyumba za uchapishaji hutumia mbinu za uchapaji wa haraka au kuchapisha upya bila ukaguzi wa kutosha, jambo linaloweza kusababisha makosa yanayoathiri matini ya Qur’ani.

Ameongeza kuwa kulinda usahihi na hadhi ya Qur’ani Tukufu ni wajibu wa pamoja, unaohitaji uangalizi wa kudumu kutoka kwa mamlaka husika, wachapishaji, pamoja na Waislamu wote.

3497060