Baraza la Kimataifa la Miujiza ya Kisayansi katika Qur’ani Tukufu na Sunnah Laanzishwa Malaysia

IQNA – Baraza la Kimataifa la Miujiza ya Kisayansi katika Qur’ani Tukufu na Sunnah limezinduliwa mjini Kuala Lumpur, Malaysia, siku ya Jumapili.

Uzinduzi huo umefanywa na Mohammed bin Abdulkarim Al‑Issa, Katibu Mkuu wa Jumuiya ya Waislamu Ulimwenguni (Muslim World League – MWL) na Mwenyekiti wa Jumuiya ya Wanazuoni wa Kiislamu.

Katika ziara yake Kuala Lumpur, Al‑Issa pia aliongoza sherehe ya kufunga mpango na mashindano ya Science and Faith (Sayansi na Imani).

Matukio yote mawili yalihudhuriwa na wanazuoni wa kimataifa, mawaziri wa serikali, na viongozi wakuu wa vyuo vikuu.

Malaysia iliandaa mikutano hii miwili ya kimataifa kama sehemu ya ushirikiano wake na MWL katika kuunga mkono programu za kielimu na Kiislamu. Ushirikiano huu uliimarishwa zaidi kupitia utiwaji saini wa makubaliano saba kati ya MWL na taasisi mbalimbali za serikali na sekta binafsi nchini Malaysia, zikiwemo vyuo vikuu, vituo vya utafiti na taasisi za kitaaluma.

Baraza hili jipya limekusudiwa kuendeleza uchambuzi wa kielimu kuhusu dhana ya tafakuri ya kisayansi ndani ya Qur’ani Tukufu na Sunnah. Wakati huohuo, mpango na mashindano ya Sayansi na Fiqhi yanakusudia kuhamasisha utafiti, ubadilishanaji wa maarifa, na mijadala inayoleta pamoja taaluma za kisayansi na mafundisho ya Kiislamu.

Sherehe ya kufunga ilijumuisha pia wasilisho la kielelezo lililoonyesha shughuli na malengo ya programu hiyo, sambamba na kutangazwa kwa Tuzo za Kimataifa za Jumuiya ya Waislamu Ulimwenguni.

3497160