Hati Adimu ya Qur’ani yadhihirisha urithi wa Sanaa na Imani katika Makumbusho ya Qur’ani Tukufu
Nakala hiyo adimu ya Qur’ani, yenye umri wa zaidi ya miaka 400, inaonyeshwa katika Makumbusho ya Qur’ani Tukufu mjini Makkah, ikiwapa wageni taswira ya kuvutia kuhusu ustadi wa kisanaa na urithi wa kitamaduni wa ustaarabu wa Kiislamu.
Hati hiyo, ambayo ni miongoni mwa vitu vya thamani zaidi katika makumbusho hayo, inarejea karne ya 11 Hijria (karne ya 17 Miladia). Ina mapambo ya dhahabu yaliyochongwa kwa ustadi, rangi ang’avu na maandishi ya kaligrafia yaliyotengenezwa kwa umahiri mkubwa, yakionyesha kiwango cha juu kilichofikiwa katika uandishi na utayarishaji wa misahafu ya Qur’ani katika kipindi hicho.
Kurasa zake zimepambwa kwa michoro maridadi ya maua na mapambo ya kifasaha, huku ukurasa wa mwanzo unaojumuisha Suratul-Fatiha ukiwa na muundo wa ulinganifu unaochanganya usahihi wa kijiometri na mapambo ya dhahabu yenye maelezo ya kina.
Maafisa wa makumbusho wanasema kuwa hati hiyo inaonyesha ustadi wa wapigaji kalamu na wasanii wa mapambo wa Kiislamu waliogeuza uandishi wa Qur’ani kuwa sanaa iliyokomaa, wakichanganya umakini wa maandishi na ubunifu wa mapambo.
Hati hiyo imehifadhiwa katika Makumbusho ya Qur’ani Tukufu yaliyo katika Wilaya ya Kitamaduni ya Hira mjini Makkah, na ni sehemu ya mkusanyiko unaofuatilia maendeleo ya uandishi na mapambo ya misahafu ya Qur’ani katika karne mbalimbali.
Maonyesho hayo yanawapa wageni fursa ya kuchunguza maendeleo ya sanaa ya maandishi ya Kiislamu na heshima kubwa ambayo Waislamu wamekuwa wakiiweka kwa Qur’ani Tukufu kwa karne nyingi, si tu kama kitabu kitakatifu bali pia kama chanzo cha msukumo wa kitamaduni na kisanaa.
Hati hii ya kale ni ushahidi wa utajiri wa urithi wa Kiislamu na inaendelea kuwa moja ya vivutio muhimu zaidi katika makumbusho hayo, ikihifadhi urithi wa ustadi wa kisanaa unaoendelea kuwavutia wageni kutoka sehemu mbalimbali za dunia.
3497891
