Mwanamke Mholanzi aliyesilimu anasaidia Wapalestina Gaza

IQNA - Natalie Hatten ni mwanamke kutoka Uholanzi ambaye alisilimu mwaka 1993.

Akizungumza na kipindi cha Ayyam Allah kwenye televisheni ya Al Jazeera Arabi, alifafanua kuhusu njia yake ya kuelekea katika kuukumbatia Uislamu kama njia ya maisha na kazi zake za hisani ambazo ni pamoja na kutoa misaada kwa watoto katika Ukanda wa Gaza.
Kuvutiwa kwake na Uislamu kulianza baada ya kuingia Chuo Kikuu cha Amsterdam mnamo 1993.
Anasema alipata urafiki na uvumilivu katika maingiliano yake na wanafunzi Waislamu katika chuo kikuu.
Natalie alianza kwa kusoma Qur’ani, kwa sababu hivyo ndivyo mtu yeyote anayetaka kujua kuhusu Uislamu hufanya.
Ameongeza kuwa katika chuo kikuu, wanafundisha wanafunzi jinsi ya kuwa na mtazamo muhimu na kusoma na kutafakari maswala kutoka kwa mitazamo tofauti.
Hivyo ndivyo alivyosoma Qur’ani na baada ya hapo akaanza kusoma kitabu kiitwacho “This Is The Very Truth” yaani ‘Huu Ndio Ukweli’.
Kitabu hicho kilihusiana na kongamano lililofanyika mwanzoni mwa miaka ya 1990 ambapo idadi kubwa ya wasomi na wanasayansi walijadili jinsi aya za Qur’ani zinavyohusiana na sayansi ya kisasa.
Baada ya kusoma kitabu hicho na kujifunza zaidi kuhusu Uislamu, Natalie alisilimu na hivyo akanza kufuata na kutekeleza mafundisho ya dini tukufu ya Kiislamu maishani.
Kisha alianza kazi za hisani kusaidia watu, Waislamu na wasio Waislamu.
Anasema shughuli za kibinadamu ni sehemu ya dini kwani Uislamu unaweka umuhimu kwa ubinadamu na kusaidiana.
Ndiyo maana Natalie na mume wake walianzisha taasisi ya kutoa misaada nchini Uholanzi.
Pia wamenunua kanisa kongwe nchini Kanada na kuligeuza kuwa kituo cha kitamaduni ili kukuza maendeleo ya kitamaduni na kiroho ya vijana.
Kuhusu shughuli zao huko Gaza, alisema wametoa msaada kwa watoto na wengine katika eneo la Palestina na pia huko Lebanon.
Wamepeleka vyakula, nguo na vifaa vya kupasha joto katika maeneo hayo mawili, alisema, na kuongeza kuwa maadamu vita vinaendelea huko, hawataacha kupeleka misaada.
Ameongeza kuwa pia wameanzisha kituo cha elimu kiitwacho "Balozi wa Peponi" kwa ajili ya watoto wa Gaza lakini lengo lao kuu ni kuwapa chakula na maji safi watoto ambao wengi wao wamekuwa wakikabiliwa na utapiamlo kutokana na mauaji ya kimbari yanayoendelezwa na utawala wa Israel, vita na kizuizi cha eneo la Palestina.

/3490734