Ukumbi Mpya wa Qur’ani Wazinduliwa katika Msikiti wa Badshahi, Lahore – Pakistan
Katibu Mkuu wa Punjab, Zahid Akhtar Zaman, alisema katika hafla ya uzinduzi kwamba kuhifadhi, kukuza na kuwasilisha kwa ufanisi turathi takatifu ya Kiislamu (Tabarrukat) kwa vizazi vijavyo ni miongoni mwa vipaumbele vikuu vya serikali.
Alieleza kuwa turathi hizo zenye heshima kubwa zinajumuisha nakala adimu za Qur’ani Tukufu, kazi bora za kaligrafia ya Kiislamu, vitu vya kihistoria vyenye utakatifu, pamoja na hazina nyingine muhimu za urithi wa Kiislamu, ambazo zote zinahifadhiwa na kuwasilishwa kwa kuzingatia viwango vya kisasa.
Aidha alisisitiza kwamba urithi wa kielimu na falsafa ya kishairi ya Allama Muhammad Iqbal unaendelea kuhamasisha umoja, kujitambua, na maendeleo katika jamii.
Aliongeza kuwa ukumbi huo hautaimarisha tu uhusiano wa kiroho, bali pia utatoa jukwaa la kipekee kwa wageni kujifunza historia ya Uislamu, sanaa ya uandishi wa Kiarabu, na urithi wa kidini.
Hafla hiyo iliandaliwa na Idara ya Masuala ya Kidini na Awqaf ya Punjab, na ilihudhuriwa na Katibu wa Mambo ya Ndani Dkt. Ahmed Javed Qazi, Mkurugenzi Mkuu Najmus Saqib, Katibu na Mkuu wa Utawala Dkt. Ehsan Bhutta, Khateeb Abdul Khabeer Azad, Mkurugenzi Mkuu wa Masuala ya Kidini Punjab Hafiz Anees ur Rehman, pamoja na maafisa wengine waandamizi.
Zaman alieleza pia umuhimu wa kihistoria wa tukio hilo, akisema kuwa mara ya mwisho mabaki hayo yalihamishwa ilikuwa mwaka 1885 wakati wa utawala wa kikoloni wa Waingereza (British Raj), baada ya ombi la Anjuman‑e‑Islam, ambapo yalipelekwa katika ukumbi wa zamani wa Msikiti wa Badshahi. “Sasa, baada ya karibu miaka 150, chini ya uongozi wa Dkt. Ehsan Bhutta, turathi hizi zimehamishwa kwenda katika ukumbi mpya unaokidhi mahitaji ya karne ya 21. Ingawa ukumbi huu ulijengwa ndani ya kipindi cha mwaka mmoja na nusu uliopita, maono na uongozi wa Dkt. Bhutta ndiyo yaliwezesha kufanikisha hatua hii ya kihistoria,” alisema.
Katika hotuba yake, Dkt. Ehsan Bhutta alielezea turathi za Kiislamu kuwa ni urithi wa kiroho na kihistoria usio na kifani, ambao uhifadhi wake unahitaji matumizi ya teknolojia za kisasa.
Alisema kuwa Ukumbi mpya wa Tabarrukat‑e‑Quran ni hatua muhimu na unatarajiwa kuwa kituo mashuhuri cha kielimu na kiroho, kitakachowezesha uelewa wa kina kuhusu Qur’ani Tukufu, mila ya uandishi wa nakala za Qur’ani, na maendeleo ya ustaarabu wa Kiislamu.
Bhutta aliongeza kuwa kituo hicho ni cha matumizi mbalimbali, kikiwa na ukumbi wa mikutano ulio na vifaa kamili, maktaba ya utafiti na masomo, mkusanyo wa kazi za Allama Iqbal pamoja na mafundisho ya Usufi, vifaa vya kompyuta na intaneti kwa ajili ya kusoma vitabu, maktaba adimu ya picha, na sehemu maalumu za kutoa maelezo kwa wageni wa ndani na wa kimataifa kuhusu majengo na maeneo ya kihistoria.
Aidha, kituo hicho kina ofisi za Msimamizi wa Kanda na Khateeb, pamoja na eneo maalumu la kupokea wageni mashuhuri (VIP), jambo linalokifanya kuwa kitovu kamili cha elimu, utawala, na mafunzo ya kiroho.
Alisema pia kwamba Idara ya Awqaf inaendelea na juhudi za kuhifadhi turathi hizo kwa mfumo wa kidijitali pamoja na kufanya tafiti za kitaaluma, sambamba na mkakati wa kuutambulisha urithi tajiri wa Pakistan katika kiwango cha kimataifa ili kuonyesha taswira chanya na yenye mwanga wa nchi hiyo. Dkt. Bhutta alithibitisha upya dhamira ya idara hiyo katika kulinda na kuwasilisha kwa ufanisi urithi wa kidini katika jimbo lote.
Wasomi na viongozi wa dini waliohudhuria hafla hiyo pia walisisitiza umuhimu endelevu wa fikra za Allama Iqbal na wajibu wa kuhifadhi urithi wa Kiislamu kama amana muhimu kwa vizazi vijavyo.
3497042
