Kosovo: Aliyevunjia heshima Qur'ani Tukufu Kosovo ashtakiwa

IQNA – Mwanaume mmoja ameshtakiwa rasmi nchini Kosovo kwa kitendo cha kuvunjia heshima Qur’ani Tukufu miezi michache iliyopita.

Ofisi Maalum ya Mwendesha Mashtaka wa Kosovo iliwasilisha hati ya mashtaka Jumanne dhidi ya mtuhumiwa anayekabiliwa na tuhuma za kuchochea migawanyiko ya kijamii baada ya kudhalilisha kitabu kitakatifu cha Uislamu.

Katika taarifa kwa vyombo vya habari, mwendesha mashtaka alimtaja mtuhumiwa huyo kwa herufi za awali I.P., na kueleza kuwa alichana na kutupa kurasa za Qur’ani mwanzoni mwa Machi mwaka huu karibu na kituo cha kidini cha Saraçhane katika mji wa Prizren, kusini mwa Kosovo.

Taarifa hiyo ilisomeka:
"Uchunguzi umebaini kuwa I.P. alichana na kutupa kurasa za Qur’ani Tukufu chini, jambo lililosababisha ghadhabu kubwa miongoni mwa Waislamu na kuhatarisha mshikamano wa pamoja kati ya watu wa imani mbalimbali."

Ameshtakiwa rasmi kwa kosa la kuchochea mgawanyiko na chuki ya kidini chini ya Kifungu cha 141, kifungu kidogo cha 1 cha Kanuni ya Adhabu ya Kosovo.

Kosa hilo lina adhabu ya faini na kifungo cha hadi miaka mitano gerezani, kulingana na Kanuni ya Adhabu.

Hata hivyo, waendesha mashtaka wameiomba mahakama kutoa agizo la matibabu ya lazima ya kisaikolojia kwa mtuhumiwa huku akiwa huru.

Wamesisitiza ombi hilo kwa maelezo kuwa “uwezo wake wa kuhukumu na kujizuia wakati wa kutenda kosa hilo ulikuwa umeharibika kwa kiwango kikubwa.”

3493172