Kuimarisha Mshikamano wa Qur’ani, Familia na Jamii katika Msikiti wa São Paulo

IQNA – Darasa la mafunzo ya Qur’ani linaloendelea katika Kituo cha Kiislamu cha São Paulo linatoa mfano wa vitendo wa jinsi ya kuunganisha Qur’ani, familia, elimu na jamii katika mfumo mmoja ulio thabiti ndani ya mazingira ya msikiti.

Katika tajriba ya kielimu yenye kuvutia sana, inayoonyesha namna Uislamu unavyoenea miongoni mwa wahamiaji, kozi ya Qur’ani iliyoandaliwa na Msikiti na Kituo cha Kiislamu cha São Paulo nchini Brazil imeangaziwa kama mfano wa hali ya juu unaobadilisha uhusiano kati ya mtoto, wazazi na msikiti.

Kwa mujibu wa tovuti ya Muslimsaroundtheworld, kozi hii inafanyika chini ya usimamizi wa Sheikh Abdulhamid Mutawalli, Rais wa Kituo cha Kiislamu cha Kimataifa cha Amani na Uvumilivu nchini Brazil na Amerika ya Kusini. Inatekelezwa ndani ya mtazamo wa kielimu unaoona kwamba malezi ya Qur’ani hayawezi kutenganishwa na mtu binafsi wala familia, na kwamba athari yake haikamiliki bila uungwaji mkono wa kijamii ulio makini na endelevu.

Uwepo huu wa kifamilia si jambo dogo la kiusimamizi, bali umegeuka kuwa nguzo muhimu katika mchakato huu wa malezi. Unaimarisha hisia ya mtoto ya kuwa sehemu ya jamii, unaunganisha kwa njia chanya ujifunzaji wa Qur’ani Tukufu na familia pamoja na jamii, na unampa mtoto faraja na utulivu wa kisaikolojia.

Mtazamo huu umeleta athari dhahiri kwa watoto wanaoshiriki, kwani uwepo wa wazazi umeongeza hamasa, kuimarisha kujiamini, na kuifanya akili ya mtoto kuihusisha nyumba ya msikiti na mahali salama penye mapenzi, penye kuunganisha elimu na ushirikiano wa kijamii.

Habari inayohusiana

• Watoto Waislamu wa Brazil Waanza Kozi ya Kuhifadhi Qur’ani huko Sao Paulo

Mtoto anayemuona mzazi wake kama sehemu ya safari yake ya kielimu hupokea ujumbe wa ndani kwamba Qur’ani ni thamani ya pamoja katika familia, na kwamba msikiti ni mwendelezo wa maisha yake ya kila siku, si mahali palipootengwa na uhalisia wa maisha yake.

Moja ya dhihirisho la ubunifu katika uendeshaji wa kozi hii ni utayari wa Kituo cha Kiislamu cha São Paulo kubadilisha tarehe za vikao vyake na shughuli zake, kwa kuzingatia mazingira na majukumu tofauti ya familia. Hatua hii inalenga kuhakikisha ushiriki wa idadi kubwa zaidi ya wazazi, na inaonyesha uelewa wa kina wa mwenendo wa maisha ya kila siku ya jamii ya Waislamu nchini Brazil.

Uwepesi huu wa kiusimamizi umechangia kugeuza kozi za Qur’ani kuwa sehemu yenye mvuto wa kijamii, na kusisitiza kwamba mafanikio ya elimu ya dini katika jamii za wahamiaji yanategemea uwezo wake wa kugusa na kuakisi uhalisia wa maisha ya watu.

Matunda ya tajriba hii yanavuka mipaka ya elimu pekee na yanachangia kujenga uhusiano imara wa kijamii kati ya familia za Kiislamu. Vikao vya kozi hii vimekuwa jukwaa la kufahamiana, kuimarisha kuaminiana na kubadilishana tajiriba, na hivyo kuligeuza Kituo cha Kiislamu kuwa kitovu halisi cha kijamii kwa Waislamu wa São Paulo.

Katika mradi huu, msikiti umejirejeshea nafasi yake kama kituo cha kina, kisicholenga ibada na elimu pekee, bali pia mahusiano ya kibinadamu na kukuza mshikamano wa kijamii.

Habari inayohusiana

• Mpango wa Elimu Brazil Walenga Kuimarisha Uhusiano wa Watoto na Qur’ani Tukufu

Tajriba hii inasisitiza kwamba elimu ya Qur’ani, inapodhibitiwa kwa mtazamo mpana na wa kina wa kielimu, inaweza kuwa mradi wa kujenga jamii, si shughuli ya mara kwa mara tu ya ufundishaji.

Inaonyesha kuwa mwendo wa jamii huanzia katika familia, hukua ndani ya msikiti, na huwa imara na madhubuti pale unapongozwa na elimu sahihi na ufahamu makini wa malezi.

4329255