Kozi za Qur’ani Zaanza Tena Lebanon

IQNA – Kozi za mafundisho ya Qur’ani zimeanza tena nchini Lebanon kufuatia juhudi za Kituo cha Kimataifa cha Uenezi wa Qur’ani kinachohusishwa na Idara ya Mfawidhi wa Haram Tukufu ya Imamu Hussein (AS) huko Iraq. Kituo hicho kimetangaza kuwa kozi hizo zimeanza upya kupitia matawi yake nchini Lebanon pamoja na kituo cha Dar al-Qur’ani cha Imamu Ali (AS), baada ya mafanikio ya programu za Qur’ani katika vijiji na miji kadhaa ya Lebanon.

Sayyid Ali Abul Hassan, mkuu wa matawi nchini humo, amesema kuwa miongoni mwa malengo ya kuendesha kozi hizi ni kuimarisha utamaduni wa Qur’ani na kuasisi maadili ya dini miongoni mwa wanafunzi wa kiume na wa kike.

Amebainisha kuwa programu hizi zinajumuisha ufundishaji wa kanuni za usomaji na tajwidi, usomaji sahihi wa Qur’ani, mafunzo ya dhana za Qur’ani mahsusi kwa akina mama, masomo ya maadili ya Kiislamu yanayotokana na Qur’ani, maisha ya Ahlul-Bayt (AS), pamoja na mihadhara ya fiqhi.

Abul Hassan amesema kuwa baada ya mafanikio ya wafanyakazi wa kituo katika kuandaa mikusanyiko na mashindano ya Qur’ani katika miji na vijiji vya Lebanon katika mwezi wa Ramadhani, iliamuliwa kuendeleza kozi hizi pia katika miezi ya Shawwal, Dhul-Qa‘dah na Dhul-Hijjah.

Amesisitiza kuwa kozi hizi zinatoa fursa kwa wanafunzi na wadau kuendelea kujifunza masomo ya Qur’ani na kuimarisha uhusiano wao na Kitabu Kitukufu.

Matawi ya kituo nchini Lebanon, kupitia programu hizi, yanajitahidi kuimarisha utambulisho wa Kiislamu unaotokana na Qur’ani na kuongeza maarifa ya dini kwa mtazamo mpana unaojumuisha nadharia na mafunzo ya vitendo, jambo linaloleta athari chanya miongoni mwa washiriki.

3497244