Wito wa kuchukua hatua kukabiliana na Chuki Dhidi ya Uislamu nchini Australia

IQNA - Waislamu nchini Australia wanahitaji mabadiliko ya kudumu ili kukomesha ubaguzi, kulingana na mwandishi wa ripoti muhimu iliyobainisha kuwa hatua kubwa zaidi zinahitajika ili kung’oa mzizi wa chuki dhidi ya Uislamu (Islamophobia).

Mjumbe Maalum wa Kupambana na Islamophobia, Aftab Malik, alitoa wito kwa serikali ya shirikisho kuichukulia kwa uzito suala la Chuki  Dhidi ya Uislamu na ubaguzi wa rangi wakati alipowasilisha ripoti yake siku ya Jumamosi.

Waziri Mkuu Anthony Albanese aliwaambia waandishi wa habari kuwa serikali imekubali mapendekezo 35 kati ya 54, akisisitiza kuwa chuki inayoelekezwa dhidi ya Uislamu au Waislamu haina nafasi nchini Australia.

Kutolewa kwa ripoti hiyo kunajiri baada ya kipindi kirefu cha kusubiri kwa Waislamu wa Australia, ambao wanaendelea kukabiliwa na vitendo vya Chuki  Dhidi ya Uislamu katika maisha yao ya kila siku, Bwana Malik alisema.

“Mabadiliko ya kudumu yanahitaji serikali na jamii ya Kiislamu kudumisha ushirikiano, kujenga uaminifu, kuimarisha maelewano, na kufanya kazi kuelekea malengo ya pamoja,” alisema.

Bwana Malik aliongeza kuwa huu ni mwanzo tu wa safari.

“Ili kukabiliana na Chuki  Dhidi ya Uislamu katika mizizi yake, ni lazima tushughulikie maswali yenye changamoto,” alisisitiza Bwana Malik.

Waziri wa Mambo ya Ndani, Tony Burke, aliongeza kuwa vitendo vya Chuki  Dhidi ya Uislamu bado “haviripotiwi ipasavyo” na kwamba ni “jambo linalodhoofisha jamii.”

Alisema: “Tumeshuhudia ongezeko la mashambulizi ya chuki dhidi ya Uislamu na matusi yanayoelekezwa kwa Waislamu wa Australia.”

“Ni jambo lililoenea kila mahali. Ni lenye kudhoofisha. Na ni jambo lisilokubalika kamwe.”

/3498312