Nyama za Idul Adha za Waislamu wa Singapore kusambazwa Gaza

IQNA – Waislamu nchini Singapore (Singapuri) wamejitolea kuchangia nyama kwa watu wa Gaza wakati wa sikukuu ya Idul Adha, kutokana na janga la kibinadamu katika Ukanda huo uliozingirwa na utawala dhalimu wa Israel.

Kwa mujibu wa gazeti la The Straits Times, usajili kwa ajili ya ibada ya kuchinja (Qurban) umeanza tarehe 10 Aprili na utaendelea hadi 31 Mei. Sehemu ya nyama ya kondoo watakaochinjwa itasindikwa na kuhifadhiwa kwenye makopo, kisha kusambazwa kwa Wapalestina wa Gaza.

Katika mwaka wa 2025, misikiti 52 nchini Singapore itashiriki kutoa huduma za kuchinja nje ya nchi, kwa mujibu wa kamati ndogo ya SalamSG Qurban. Kutokana na mipango ya kimkakati iliyoanzishwa mwaka 2020 wakati wa janga la COVID-19, wanyama watachinjwa Australia, kisha nyama yao kupelekwa Singapore kwa makundi yaliyo na uhitaji.

Makundi hayo ni pamoja na walengwa wa zakat, familia za wafungwa, na wafanyakazi wahamiaji wa muda. Misikiti sita imeteuliwa kuwa vituo vya ndani vya ibada hiyo, huku maelezo zaidi yakitarajiwa kutoka kwa wauzaji waliothibitishwa.

Kwa kushirikiana na wasambazaji wenye uzoefu na mashirika ya misaada nchini Jordan, SalamSG Qurban imehakikisha kuwa nyama itafika Gaza kwa wakati.

3492648