Kozi za Qur'ani za majira ya kiangazi kwa wanafunzi wa Iraq kuanza Mei 25

IQNA – Kituo cha Kitaifa cha Sayansi za Qur'ani, kilicho chini ya Idara ya Waqfu wa Kishia ya Iraq, kinapanga kuandaa kozi za Qur'ani za majira ya kiangazi kwa wanafunzi wa shule.

Kozi hizi zitafanyika kwa wasichana na wavulana wenye umri kati ya miaka 6 hadi 15 katika Ukumbi wa Thaqalayn wa kituo hicho.

Kwa mujibu wa taarifa ya kituo, kozi hizo zitaanza tarehe 25 Mei na zitadumu kwa muda wa miezi mitatu. Masomo yatafanyika kila siku kuanzia saa 4 asubuhi hadi saa 6 mchana kwa saa za eneo. Siku tatu za juma (Jumapili, Jumanne na Alhamisi) zimetengwa kwa ajili ya wasichana, huku siku mbili (Jumatatu na Jumatano) zikiwa ni kwa ajili ya wavulana.

Walimu kutoka Kitengo cha Shughuli za Qur'ani cha kituo hicho, Kituo cha Kuhifadhi Qur'ani, na Kitengo cha Wanawake Wanaohifadhi na Kusoma Qur'ani watasimamia kozi hizo.

Kutakuwa na masomo ya fiqhi (sheria za Kiislamu), itikadi (imani za Kiislamu) na maadili, pamoja na vipindi vya ziada vinavyohusisha kuhifadhi Juzuu na Sura za Qur’ani, pamoja na mafunzo ya sheria za usomaji sahihi wa Qur’ani (tajwidi).

Shughuli za Qur'ani zimekua kwa kiwango kikubwa nchini Iraq tangu kuondolewa kwa dikteta wa zamani Saddam mwaka 2003.

Katika miaka ya hivi karibuni, kumekuwa na ongezeko la programu za Qur’ani kama vile mashindano, vikao vya usomaji na programu za kielimu zinazofanyika nchini humo.

3493022