Al-Azhar na Radio ya Qur’ani Misri Kuandaa Kurekodi Qiraa Mpya

IQNA – Kituo cha Kiislamu cha Al-Azhar nchini Misri pamoja na Radio ya Qur’ani ya taifa hilo, hivi karibuni wataanza mradi wa kurekodi qiraa mpya za Qur’an Tukufu.

Ismail Douidar, mkuu wa Radio ya Qur’ani, alitangaza mpango huo kwa ushirikiano na Shirika la Kitaifa la Habari la Misri na Al-Azhar. Alieleza kuwa bado wako katika hatua ya kuchagua maafisa wa kurekodi na hawajafikia hatua ya kuanza kurekodi rasmi.

Douidar aliongeza kuwa mradi huu utajumuisha kurekodi qiraa tatu mpya, na kufanya jumla ya qiraa za redio kufikia saba. Qiraa hizo zitakuwa kwa tarteel na zitasomwa na makari wa Al-Azhar.

“Wiki iliyopita nilikutana na Sheikh Ahmed Al-Tayeb, Sheikh wa Al-Azhar, na katika kikao hicho tulijadili kwa kina maelezo ya mradi huu na taratibu zake,” alisema Douidar.

Akaongeza kuwa mradi huu unalenga kudumisha hadhi ya Radio ya Qur’ani, kuimarisha jukumu lake la kidini, na kutoa qiraa kwa viwango vya juu vilivyokubaliwa.

Misri, nchi ya Afrika Kaskazini yenye takriban watu milioni 100, ni taifa lenye Waislamu takriban asilimia 90 ya idadi ya watu. Shughuli za Qur’ani ni za kawaida sana katika taifa hili la Kiarabu lenye Waislamu wengi, na makari mashuhuri wa ulimwengu wa Kiislamu wa zamani na sasa wametoka Misri.

3495909