Msomi wa Al-Azhar: Lengo Kuu la Qur'an ni Kurejesha Heshima ya Mwanadamu

IQNA – Naibu Mkuu wa Chuo cha Kiislamu cha Al-Azhar nchini Misri ametaja kurejesha heshima ya mwanadamu kuwa ndilo lengo kuu la Qur'ani Tukufu.

Mohamed al-Duwaini alisema kuwa madhumuni ya Qur'ani ni usafishaji wa roho na urekebishaji wa mawazo, hisia na mihemko, katika mkutano wa kimataifa uliofanyika Sharjah, Umoja wa Falme za Kiarabu, kuhusu matumizi ya mafundisho ya Qur'ani.

Alisema wanazuoni wamejaribu kufasiri Qur'ani, kufafanua maana zake, na kutoa hukumu kutoka ndani yake.“Wamechunguza maneno ya Qur'ani kwa makini, na wametoa siri zake,” alisema.

Al-Duwaini alisema mkutano huu “unatupeleka mbali zaidi ya kutafakari tu juu ya undani wa Neno la Mungu au mpangilio wa ajabu wa aya zake, bali unatufikisha kwenye malengo ya juu kabisa ya kitabu hiki kitukufu yaliyofichika ndani ya aya, sentensi na maneno yake.”

Alisema kuwa wanazuoni wa zamani walitofautiana kuhusu lengo la Qur'ani. “Baadhi yao walizingatia mtazamo wa nje wa aya, ilhali wengine waliunganisha malengo ya Qur'ani na malengo ya Sharia ya Kiislamu. Lakini inapaswa kusemwa kwamba malengo ya Qur'ani ndiyo mada kuu zinazoshughulikiwa na aya zake, na ni sahihi zaidi kuzingatia malengo na madhumuni yaliyo nyuma ya aya ambazo Qur'ani iliteremshwa kwa ajili yake.”

Kwa mujibu wa mwanazuoni huyo, Qur'ani Tukufu inafuatilia malengo na madhumuni mengi ambayo mwanadamu anayahitaji kwa dharura katika dunia inayokumbwa na migogoro ya kisiasa, kijamii, kiuchumi, kitamaduni na kiteknolojia.

“Tunaamini kuwa Qur'ani ni ujumbe wa mwisho wa Mungu kwa wanadamu. Ni muhimu kuelewa kuwa kitabu hiki cha muujiza kimetoa suluhisho madhubuti kwa matatizo ya kibinadamu na kimeelekeza tiba ya nafsi na maradhi ya kiakili. Qur'ani inatukumbusha kuwa sisi ni taifa lenye historia na utambulisho imara kama mlima. Aya zake zinatukumbusha kuhusu maadili tunayopaswa kuwa nayo, na mafundisho yake yanatufundisha kuwa sisi ni taifa la elimu na vitendo. Leo tunashuhudia kuuliwa kwa watu waliokuwa na haki ya kuwepo Palestina na kunyimwa haki yao ya kuishi. Tunamuomba Allah awasaidie ndugu zetu katika vita vya Gaza na atupe nuru ya macho yetu, na hilo litafanyika hivi karibuni, Insha’Allah.”

3492749