Mashindano ya Qur’ani kwa Wanafunzi Yazinduliwa Yemen

IQNA – Mashindano ya Qur’ani kwa wanafunzi wa kiume na wa kike kutoka shule za serikali na binafsi yameanza Jumapili katika Mkoa wa Hodeidah, Yemen.

Sekta ya elimu katika Wilaya ya Al-Hali, mkoani Al-Hodeidah, imezindua mashindano hayo kama sehemu ya programu ya kukuza stadi za kitamaduni, yakibeba kaulimbiu “Na usome Qur’ani kwa tartiil.”

Wanafunzi sitini wa kiume na wa kike kutoka shule za wilaya hiyo wanashiriki katika mashindano hayo ya siku mbili, katika viwango vya kuhifadhi Qur’ani Tukufu: “Juzuu 3, 5, 10, 15 na 30,” chini ya uratibu na usimamizi wa Idara za Shughuli za Shule na Elimu ya Qur’ani.

Wakati wa uzinduzi, afisa wa sekta ya elimu mkoani humo, Omar Bahr, alisisitiza umuhimu wa mashindano haya katika kuwahamasisha wanafunzi kuhifadhi na kusoma Kitabu cha Mwenyezi Mungu kwa uzuri, pamoja na kukuza thamani za kiimani na utambulisho wa Qur’ani miongoni mwa vijana.

Kwa upande wake, Mkurugenzi wa Wilaya, Muayid Al-Muayid, alibainisha kuwa wilaya inatoa kipaumbele kikubwa kwa shughuli za kielimu, hasa mashindano ya Qur’ani, kutokana na mchango wake katika kukuza uwezo wa wanafunzi na kuendeleza vipaji vyao.

Naye Mkurugenzi wa Idara ya Elimu katika wilaya hiyo, Hassan Wahban, alieleza kuwa mashindano haya ni sehemu ya mpango wa shughuli za shule kwa mwaka wa masomo, yanasaidia kugundua wanafunzi wenye umahiri wa kuhifadhi na kusoma Qur’ani, na yanawahamasisha wanafunzi kujiimarisha katika kushikamana na Qur’ani Tukufu.

3495967