Kisomo cha mwana wa Sheikh Shasha’i kinarushwa na Idhaa ya Qur’ani ya Misri

IQNA – Idhaa ya Qur’ani ya Misri kila siku katika kipindi chake cha jioni hurusha tilawa za Ibrahim Shasha’i, mwana wa qari mashuhuri wa Kimisri marehemu Sheikh Abdel Fattah Shasha’i.

Kisomo hicho hurushwa kupitia kipindi maarufu cha Idhaa ya Qur’ani kiitwacho “Zabibu kutoka Bustani za Imani.”

Sheikh Ibrahim Shasha’i, mmoja wa maqari mashuhuri wa Misri, alizaliwa mwaka 1930 katika mtaa wa Darb al-Ahmar, mojawapo ya maeneo ya kale ya kihistoria jijini Cairo.

Alikuwa mwana wa Sheikh Abdel Fattah Shasha’i, na asili ya familia yake ilikuwa kutoka kijiji cha Shasha’a, katika wilaya ya Ashmoun, mkoa wa Menoufia, nchini Misri.

Sheikh Abdel Fattah alihamia Cairo na kuishi katika eneo la Darb al-Ahmar, ambako Sheikh Ibrahim alizaliwa. Alijulikana kama msomaji mkubwa wa Qur’ani na pia mwana wa sheikh mkubwa.

Sheikh Ibrahim alihifadhi Qur’ani Tukufu tangu akiwa mtoto, na akajifunza elimu za Qur’ani pamoja na fani ya usomaji wake. Miongoni mwa walimu wake mashuhuri alikuwa Muhammad Suleiman al-Shandawi, msomaji mkuu wa Msikiti wa Imam Hussein (AS) jijini Cairo. Vilevile alisomea muziki wa Kiarabu na maqamat za sauti katika Taasisi ya Muziki ya Fouad I.

Nyota ya qari huyu wa Kimisri ilianza kung’aa mwanzoni mwa miaka ya 1950, sambamba na baba yake. Baada ya kifo cha baba yake mwaka 1962, Ibrahim alimrithi katika Msikiti wa Sayyidah Zainab nchini Misri, na mwaka 1967 akaunganishwa rasmi na Redio ya Qur’ani ya Misri kama msomaji wa Qur’ani.

Shasha’i kijana alikiri athari kubwa ya mtindo wa usomaji wa baba yake kwake, akisisitiza kuwa baba yake naye alikuwa ameathiriwa na mtindo wa Sheikh Ahmed Nada, ambaye alikuwa miongoni mwa wasomaji wa kizazi kilichotangulia kabla ya Sheikh Rifaat.

Sheikh Ibrahim alipendwa sana kwa sauti yake nzito na yenye mvuto, kwa namna yake ya usomaji iliyojaa ladha ya kienyeji, kwa umahiri wake katika kanuni za waqf na ibtida’, na kwa utulivu pamoja na haiba yake katika tilawa.

Alifuata nyayo za baba yake kwa kuonesha usomaji fasaha, utendaji wenye nguvu, na mshikamano thabiti kwa kanuni za tajwid. Ameacha nyuma hazina ya rekodi za tilawa zake zenye thamani, ambazo bado zinarushwa hadi leo.

Qari huyo wa Kimisri alisafiri katika ulimwengu wa Kiarabu na Kiislamu kama balozi wa Qur’ani Tukufu, akihudhuria majlisi na mahafali ya Qur’ani katika nchi mbalimbali, hususan katika masiku ya mwezi mtukufu wa Ramadhani.

Sheikh Ibrahim Shasha’i alifariki dunia tarehe 9 Juni 1992.

349778