Mamillioni ya wananchi wa Iran washiriki katika Siku ya Kimataifa ya Quds

IQNA-Mamillioni ya wananchi wa Iran wamejitokeza katika maandamano ya Siku ya Kimataifa ya Quds ambayo yamefanyika leo katika miji na maeneo mbalimbali nchini Iran.

Maandamano ya Siku ya Kimataifa ya Quds yamefanyika leo kote nchini Iran  katika Ijumaa ya mwisho ya mwezi mtukufu wa Ramadhani. 

Kwa mujibu wa waandishi wa IQNA, matembezi  ya Siku ya Quds Duniani yameanza leo ikiwa ni  Ijumaa ya mwisho ya mwezi mtukufu wa Ramadhani, ambapo kama kawaida ya kila mwaka kote nchini Iran wananchi Waislamu walioko kwenye swaumu kwa mara nyingine tena wamepaza sauti zao na kubainisha kuchukizwa kwao na  jinai za utawala wa Kizayuni dhidi ya wakazi wa Kipalestina wa Ukanda wa Gaza. 

"Siku ya Quds kutoka kimbunga cha Al-Aqsa  hadi kimbunga cha Al-Ahrar"  ndiyo kauli mbiu ya maandamano ya mwaka huu; na kwa kuwa wananchi madhulumu wa Palestina wamekuwa wakikabiliwa na mashambulizi ya makombora na ya kinyama ya  utawala wa Kizayuni kwa miezi kadhaa sasa, mwaka huu wananchi wa Iran  wamemiminika kwa wingi katika maidani na barabara mbalimbali hapa nchini kabla ya saa zilizotangazwa katika maadhimisho ya Siku ya Kimataifa ya Quds.

Katika mji mkuu wa Iran, Tehran maandamano ya Siku ya Kimataifa ya Quds yalianza kutokea katika njia 10 zilizoanishwa kuelekea Chuo Kikuu cha Tehran na kutoka katika maidani ya Ferdowsi kuelekea chuo hicho kikuu huku shughuli ya mazishi ya mashahidi wa operesheni ya kigaidi ya utawala wa Kizayuni unaochukiwa iliyojiri huko Syria ikiendelea.

Kamanda Ramadan Sharif, Mkuu wa Idara ya Kuu ya Intifadha na Quds alisema juzi katika mkutano na waandishi  kwamba maandamano ya Siku ya Kimataifa ya Quds yatafanyika katika maeneo zaidi ya 2,000 kote nchini na kwamba mwaka huu, kwa maana halisi Siku ya Kimataifa ya Quds ni ya kimataifa; na hii ni kutokana na ustahimilivu na weledi wa harakati ya muqawama na wananchi wa Palestina.  

Brigedia Jenerali Hossein Salami Kamanda Mkuu wa Jeshi la Walinzi wa Mapinduzi ya Kiislamu (IRGC) amehutubia katika maadhimisho ya leo ya Siku ya Quds Duniani.

Aidha Rais Ebrahim Raisi wa Jamhuri ya Kiislamu ya Iran amejumuika na wananchi wa Tehran katika maandamano hayo ya Siku ya Kimataifa ya Quds.

 

 

 

4208422