Dada Watatu wa Kipalestina wahihifadhi Qur’ani Tukufu Katikati ya Vita, Njaa na Ukimbizi

IQNA – Katika Ukanda wa Gaza uliokumbwa na vita, dada watatu wa Kipalestina wamekamilisha kuhifadhi Qur’ani Tukufu yote, licha ya kuvumilia mashambulizi ya kijeshi ya Kizayuni, uhamisho wa kulazimishwa, na njaa kali.

Hala (miaka 20), Alma (miaka 17), na Sama (miaka 15) Al-Masri kutoka Khan Younis wamefikia hatua hii muhimu chini ya usimamizi wa dada yao mkubwa, Nada Al-Masri (miaka 22), ambaye mwenyewe alikamilisha kuhifadhi Qur’ani mnamo mwaka 2023 na sasa anafundisha Qur’ani.

“Nahisi kama nimepata dunia nzima. Mafanikio haya ni kwa fadhila za Mwenyezi Mungu Mtukufu kwanza, kisha kwa shukrani kwa binti yangu Nada, aliyesimamia juhudi za dada zake hadi mwisho,” alisema baba yao, Kamel Mohammed Al-Masri, alipoongea na Al Jazeera Mubasher.

Wasichana hao walifuata ratiba kali ya kila siku iliyowekwa na Nada mnamo Januari 2024, bila kuahirisha kazi yoyote hadi kesho. Nidhamu hiyo iliendelea hata baada ya familia kulazimika kuhamishwa mara mbili — kutoka Khan Younis hadi Rafah mnamo Desemba, kisha hadi Al-Mawasi, walipoishi kwenye hema rahisi.

Hala alisema walikumbana na uhamisho, njaa, mashambulizi ya mabomu, na joto kali ndani ya hema, lakini walihimizana kuvumilia.

“Najivunia kwamba, In shaa Allah, nitaweka taji la heshima kichwani kwa wazazi wangu Siku ya Kiyama,” alisema.

Sama aliongeza kuwa vita havikuwahi kuvunja azma yao. “Tulikuwa na shule, msikiti, na maisha mazuri. Kisha vita vikaja na kuharibu kila kitu. Lakini kwa nia thabiti na uvumilivu, tuliweza kuhifadhi Qur’ani,” alisema.

Alma alielezea safari hiyo kuwa ngumu zaidi maishani mwake. Kabla ya vita, walihifadhi Qur’ani kwenye misikiti; sasa walilazimika kufanya hivyo ndani ya mahema. “Wakati wa baridi kulikuwa na baridi kali, majira ya joto yalikuwa na joto lisilovumilika. Lakini sasa tuna wahifadhi wanne wa Qur’ani ndani ya nyumba moja, na ni hisia isiyoelezeka,” alisema.

Mafanikio yao yanakuja katikati ya mauaji ya kimbari  dhidi ya Gaza, yaliyoanzishwa na Israel mnamo Oktoba 2023, na ambayo tayari imeua angalau Wapalestina 61,430 na kujeruhi zaidi ya 153,213.

Utawala ghasibu wa Israel ulikata msaada wote kwa Gaza mnamo Machi 2, ikidai kwa uongo kwamba Hamas inageuza misaada hiyo, na hivyo kutumia chakula kama silaha dhidi ya raia wapatao milioni 2.2.

Vikwazo vikali vimesukuma eneo hilo kwenye njaa kali, ambapo karibu watu 217, wakiwemo watoto 100 wamefariki kutokana na utapiamlo katika miezi ya hivi karibuni.

3494200