Dawlat El Tilawa: Qari Kijana wa Misri Atunukiwa Tuzo ya ‘Tawi la Dhahabu’
Kipindi cha hivi karibuni cha programu hiyo, kilichorushwa hewani Ijumaa jioni, kilishuhudia matukio ya kusisimua, ambapo namna ya kutangaza matokeo ilibadilishwa na kuacha mfumo wa kawaida wa alama za majaji. Badala yake, ulitumika mfumo mpya wa upigaji kura, ambapo kila jaji alipiga kura kwa kutumia kadi ili kumchagua mshiriki aliyestahiki zaidi kushinda tuzo maalumu ya “Tawi la Dhahabu.”
Kipindi hicho kilihusisha ushindani mkali baina ya kundi la vipaji changa na mahiri, wakiwemo Muhammad Al-Qalaji, mshiriki pekee aliyesalia katika kitengo cha watoto, pamoja na Omar Ali Awad, Abdullah Abdul-Mujood na Ali Muhammad Mustafa.
Majaji na hadhira walisisitiza kwa pamoja kuwa washiriki wote walistahiki kutambuliwa kutokana na usomaji wao uliotukuka na wenye mvuto wa hali ya juu.
Mchakato wa kura ulianza kwa kugawiwa kwa majaji kadi, ambapo kila mmoja aliandika jina la mshiriki aliyemuona anastahili kushinda, bila kufahamishwa chaguo la jaji mwingine. Hali hiyo ilizidisha hamasa na matarajio.
Matokeo yalipotangazwa, ilibainika kuwa kura ya kwanza, ya pili na ya tatu zilimwendea Omar Ali Awad, mwanafunzi wa darasa la nne, huku kura ya nne ikimwendea Muhammad Al-Qalaji. Kwa kufunguliwa kwa kadi ya tano, Omar Ali Awad alitangazwa rasmi mshindi wa Tuzo ya Tawi la Dhahabu, na akatunukiwa mbele ya Waziri wa Awqaf wa Misri, Osama Al-Azhari.
Al-Azhari aliwapongeza washiriki wote kwa maonyesho yao ya kuvutia, na akausifu kiwango cha juu cha vipaji miongoni mwa kizazi chipukizi kinachoshiriki katika programu hiyo.
Programu ya Dawlet El Telawa inazalishwa kwa ushirikiano kati ya Wizara ya Awqaf na Kampuni ya United Media Services nchini Misri, kwa lengo la kubaini na kukuza vipaji na wasomaji mahiri wa Qur’ani kutoka mikoa mbalimbali ya nchi.
Programu hiyo hurushwa kupitia vituo vya satelaiti vya Al-Hayat, CBC, Al-Nas, Misr Al-Quran Al-Karim, pamoja na jukwaa la “Watch It”, na hurushwa kila Ijumaa na Jumamosi saa tatu usiku.
Habari inayohusiana:
Jumla ya zawadi zenye thamani ya pauni milioni 3.5 za Misri zinatolewa kwa washindi.
Kwa mujibu wa taarifa, washindi wa nafasi ya kwanza katika vipengele vya usomaji na tajwid kila mmoja atapata pauni milioni moja, sambamba na kurekodiwa Qur’ani Tukufu nzima kwa sauti zao na kurushwa kwenye kituo cha Misr Quran Karim. Aidha, watapewa heshima ya kuongoza Swala ya Tarawehe katika Msikiti wa Al-Hussein wakati wa mwezi mtukufu wa Ramadhani ujao.
Programu hiyo ina baraza la majaji wa hadhi ya juu likiwa na wanazuoni na viongozi mashuhuri wa dini kutoka ulimwengu wa Kiislamu, wakiwemo Hassan Abdel-Nabi, Taha Abdel-Wahab, Mostafa Hosny na Taha Al-Nuamani. Pia huwahusisha wageni maalumu kadhaa, akiwemo Osama Al-Azhari, Nazir Mohamed Ayyad, Ali Gomaa, Ahmed Nuaina, Abdel-Fattah al-Tarouti, Jaber al-Baghdadi, msomi wa Uingereza Muhammad Ayoub Asif, na qari mashuhuri wa Morocco, Omar al-Qazabri.
3496335
