Aplikesheni ya “Usomaji wa Qur’ani kwa Njia ya Kielektroniki” kwa wanafunzi yabuniwa Misri

IQNA – Idara ya Shule ya Kituo cha Kiislamu cha Al‑Azhar nchini Misri imebuni aplikesheni mpya ya kielimu iitwayo “Usomaji wa Qur’ani kwa Njia ya Kielektroniki” kwa ajili ya wanafunzi wa shule.

Apu hii imeundwa kwa lengo la kurahisisha ufundishaji sahihi wa usomaji wa Qur’ani Tukufu kwa wanafunzi wa  kuanzia darasa la sita la shule ya msingi, sambamba na matumizi ya teknolojia za kisasa katika elimu ya Qur’ani, kwa mujibu wa ripoti ya tovuti ya Youm7.

Kwa mujibu wa ripoti hiyo, maandalizi ya mradi huu yalifanywa na timu ya wataalamu wa Apu kutoka Idara ya Shule za Al‑Azhar.

Apu hii imeundwa na kuendelezwa mahsusi ili kuwasaidia wanafunzi kusoma Qur’ani Tukufu kwa usahihi na kwa kufuata kanuni zake.

Kurugenzi Kuu ya Masuala ya Qur’ani katika taasisi ya Al‑Azhar imefanya mapitio ya kiufundi ya Apu hii ili kuhakikisha usahihi wa qiraa, na ulinganifu wake na kanuni za Tajwidi pamoja na Rasm al‑Khat ya Qur’ani (mtindo sahihi wa uandishi wa Qur’ani).

Kama chombo madhubuti cha kielimu, Apu hii inaweza kuchangia kuimarisha mchakato wa kufundisha Qur’ani katika shule za Al‑Azhar na hata nje yake, na kuwapatia wanafunzi fursa ya kufikia usomaji sahihi wa Kalamu ya Wahyi.

Kwa sasa programu hii inapatikana katika Google Play, na wanafunzi wanaweza kuipakua kwa urahisi na kunufaika na vipengele vyake mbalimbali.

Mradi huu umetekelezwa sambamba na juhudi za Al‑Azhar za kupanua matumizi ya teknolojia za kisasa katika elimu ya dini ya Kiislamu; hatua inayosaidia kuimarisha maadili sahihi ya Kiislamu na kurahisisha kuhifadhi pamoja na kusoma Qur’ani Tukufu.

3496965/