Safari nyepesi kwa mamilioni ya Majujaji: Reli ya Haramain yaongeza viti vya Hija hadi milioni 2.2

IQNA – Mahujaji wanaosafiri kati ya Makka na Madina katika msimu wa Hija mwaka huu wanatarajiwa kupata nafasi nyingi zaidi kupitia Reli ya Haramain yenye mwendo wa kasi.

Shirika la Reli la Saudia (SAR) limeongeza uwezo wa Reli ya Haramain hadi zaidi ya viti milioni 2.21 kwa msimu wa Hija wa 1447 Hijria Qamari (2026).

Ongezeko hili ni sawa na viti zaidi ya 210,000 ikilinganishwa na msimu uliopita, sambamba na safari 5,308 zilizopangwa, ikiwa ni upanuzi wa takriban asilimia 11 ili kukidhi mahitaji yaliyoongezeka ya mahujaji.

Shughuli za usafiri wa Hija kupitia reli hiyo zinatarajiwa kuanza Mei 5, kwa safari za mwanzo kutoka Kituo cha Uwanja wa Ndege wa Kimataifa cha Mfalme Abdulaziz huko Jeddah kuelekea Makka, hatua inayozindua rasmi huduma za reli kwa msimu wa Hija.

SAR imesema mtandao huo utatumia mabehewa 35 yanayoweza kwenda hadi kasi ya kilomita 300 kwa saa katika urefu wa kilomita 453. Safari kati ya Makka na Madina huchukua takriban saa mbili, kupitia vituo vitano vinavyoziunganisha miji miwili mitukufu kupitia Jeddah.

Ongezeko hili la uwezo linaendana na malengo ya Mkakati wa Kitaifa wa Usafiri na Usafirishaji wa Saudi Arabia unaolenga kuboresha huduma za usafiri na kuongeza urahisi wa mahujaji wakati wa Hija.

Reli ya Haramain ilifunguliwa kwa matumizi ya kibiashara Oktoba 2018. Inaunganisha miji mitukufu ya Makka na Madina, ikiwa na vituo Jeddah, Uwanja wa Ndege wa Kimataifa wa King Abdulaziz, na Mji wa Kiuchumi wa King Abdullah huko Rabigh.

Reli hii hufanya kazi mwaka mzima, ikihudumia wasafiri wa kawaida, watalii, na Mahujaji.

3497337