Qur'ani Tukufu iliyoandikwa kwenye mabamba ya shaba yaonyeshwa katika Makumbusho ya Makkah

IQNA – Jumba la Makumbusho ya Qur’ani Tukufu huko Makkah linaonyesha nakala ya Qur'ani au Msahafu wa kihistoria kutoka karne ya 12 Hijiria ulioandikwa kwenye mabamba ya shaba.

Kwa mujibu wa Al-Watan, Makumbusho ya Qur’ani Tukufu katika Eneo la Utamaduni la Hira huko Makka yanaendelea kutoa uzoefu tajiri wa kitamaduni na kielimu na yamefungua njia kwa wageni kuchunguza historia ya Qur’ani Tukufu na sayansi zake zinazohusiana nayo.

Wageni wanaotembelea makumbusho hayo wanaweza kuona misahafu adimu na kazi kutoka vipindi tofauti, kazi zinazoakisi umakini ambao Waislamu wameutoa kwa Kitabu cha Mwenyezi Mungu tangu kuja kwa Uislamu hadi leo.

Miongoni mwa kazi za kipekee zinazoonyeshwa kwenye makumbusho hayo ni Qur’ani Tukufu iliyoandikwa kwenye mabamba ya shaba na Qazi Ismatullah Khan.

Kazi hii inarudi nyuma hadi karne ya 12 Hijiria (karne ya 18 Miladia) na ni mfano wa usahihi na ustadi wa sanaa za Kiislamu na umakini maalum kwa uzuri na usahihi wa kisayansi katika kuandika Qur’ani.

Msahafu huu adimu ni sehemu ya mkusanyiko wa Kituo cha Mfalme Faisal cha Utafiti na Mafunzo ya Kiislamu, ambacho kimejitolea kuhifadhi na kufanya urithi wa Kiislamu kupatikana kwa wanazuoni na wapenzi, na kuweka kumbukumbu za urithi wa kitamaduni wa Kiislamu.

Kazi hii ya sanaa inawakilisha mwendelezo wa tamaduni zilizoanzishwa katika kaligrafia na mapambo ya Kiislamu, ambazo zililenga kukamilisha uandishi wa Qur’ani Tukufu katika umbo lake zuri zaidi, kwa kutumia vifaa na mbinu mbalimbali, kutoka ngozi na karatasi hadi metali; jambo linaloakisi uhusiano wa kina ambao Waislamu wananao na Kitabu cha Mwenyezi Mungu na kujitolea kwao kuiweka hai katika sanaa inayozingatia ubunifu na heshima.

Makumbusho ya Qur’ani Tukufu huko Makka yanachukuliwa kuwa moja ya makumbusho mashuhuri zaidi ya Qur’ani duniani, yakiwa yanaonyesha kazi adimu, misahafu ya kihistoria na Qur’ani kubwa zaidi ulimwenguni (mita 2.30 kwa mita 3.28) kwa mtindo wa kisasa na mwingiliano.

Makumbusho hayo yalipokea cheti cha Rekodi ya Dunia ya Guinness kwa kuonyesha Qur’ani kubwa zaidi ulimwenguni, ambayo inaweka kumbukumbu ya historia ya mkusanyiko wake tangu wakati wa Mtume Muhammad (SAW).

Makumbusho hayo hufanya kazi kama eneo kamili la kitamaduni na kitalii, likiboresha uzoefu wa wageni na mahujaji, likiwatambulisha umuhimu wa kitamaduni na kidini wa Makka kupitia miradi ya kitamaduni inayoakisi umuhimu wake wa kidini na kihistoria.

/3497351