Polisi wa Leicestershire, Uingereza wazindua Hijabu maalumu kwa maafisa wa kike Waislamu

IQNA – Jeshi la Polisi la Leicestershire nchini Uingereza limeanza kutumia hijabu maalumu kwa maafisa wa kike Waislamu, likishirikiana na Chuo Kikuu cha De Montfort (DMU).

Muundo mpya wa hijabu hiyo una mfumo wa quick-release unaoruhusu sehemu ya chini kujiondoa endapo itavutwa wakati wa mapambano, ili kulinda usalama na heshima ya afisa husika. Kwa mujibu wa ITV News, hatua hii ilitangazwa Jumatano.

Hijabu ni vazi la kidini linalofunika kichwa na shingo huku likiacha uso wazi. Mchakato wa kubuni ulihusisha mashauriano na maafisa Waislamu walioko kazini ili kuhakikisha faraja, heshima na ufanisi.

Polisi wa Leicestershire wamesema muundo huo pia unavutia huduma nyingine za dharura na huenda ukatumika hata katika sekta binafsi.

Wazo hili lilianza zaidi ya miaka 20 iliyopita na Kachero Yassin Desai. Baada ya kuchunguza miundo ya kimataifa, Kachero Desai alishirikiana na DMU mwaka 2022 kuunda hijabu inayofaa kwa majukumu ya mstari wa mbele.

“Itachukua miaka kuikamilisha ipasavyo. Tulifanya majaribio ya mapambano Enderby na maafisa wa kike wakiwa wameivaa, na ilidumu. Sehemu ya chini iliweza kujiondoa na afisa akaendelea kudumisha heshima yake,” alisema Desai.

Akaongeza kuwa DMU imeanzisha uzalishaji wa kwanza wa muundo huu nchini Uingereza. “Ni jambo la kushangaza kufikiria baada ya miaka mitatu ya utafiti na maendeleo, tumepata muundo sahihi na tunauendeleza kwa pamoja. Ni bidhaa bora, salama na inalinda heshima ya wanawake Waislamu.”

Maafisa wapya akiwemo PC Hafsah Abba-Gana na Seher Nas wamekaribisha hatua hii. PC Abba-Gana alisema: “Inatupa uhakika kwamba imani yangu na jukumu langu vinaweza kushirikiana kwa mkono mmoja, hasa kama afisa mpya.”

Inspector Marina Waka aliongeza kuwa hijabu hiyo “ni ya kustarehesha, salama na pia inaonekana nadhifu na ya kitaalamu,” akitumaini kuwa itahamasisha wanawake wengi zaidi Waislamu kujiunga na polisi.

 

3495618