Ayatullah Sistani alaani vikali vita dhidi ya Iran na Lebanon, awataka Waislamu wote kuvikemea
Mwanazuoni huyo wa Kiislamu ametoa kauli hiyo katika ujumbe uliotolewa Jumamosi kwa mnasaba wa Eid al‑Fitr, kama ifuatavyo:
Enyi waumini wanaume na wanawake, sikukuu tukufu ya Eid al‑Fitr — sikukuu ya rehema na maghfira — imetufikia baada ya mwezi uliobarikiwa wa kufunga, kusimama usiku kwa ibada, na kumwabudu Mwenyezi Mungu. Hii ni siku ya malipo ya Mola; siku ambayo Mwenyezi Mungu hujivunia waja Wake mbele ya malaika. Basi pongezi kwenu kwa kukubaliwa kwa amali zenu, na ninamuomba Mwenyezi Mungu aturudishie sikukuu hii sisi, ninyi na Umma wote wa Kiislamu kwa kheri, baraka na fadhila.
Wapendwa, ingawa Eid imejaa maana za furaha na bashasha, leo nyoyo za waumini zimejaa huzuni wanapoona maafa na misiba inayowapata ndugu zetu katika dini na ubinadamu. Wakati sisi tunapotaja kwa shukrani neema za Mwenyezi Mungu, vilio vya watoto vinasikika kwa sauti kubwa, machozi ya mama wanaoomboleza yanatiririka, na mioto ya vita inawaka juu ya nyumba zilizokuwa salama nchini Iran na Lebanon, huku mashambulizi ya kijeshi dhidi ya nchi hizi mbili yakiendelea.
Tunalaani vikali vita hivi vya kikatili na tunatoa wito kwa Waislamu wote na watu huru wa ulimwengu kuvilaani na kuonyesha mshikamano wao na watu wanaodhulumiwa wa Iran na Lebanon. Pia tunatoa wito kwa pande zote zenye ushawishi katika jamii ya kimataifa na kwa nchi za dunia, hasa nchi za Kiislamu, kutumia juhudi zao zote ili kusimamisha vita hivi.
Ewe Mola, tunakuomba kwa dua, nawe Ndiwe Msikilizaji wa maombi.
Ewe Mwenyezi Mungu, walinde waumini wanaume na wanawake popote walipo, waondolee maafa, na waunganishe katika neno la haki.
Ewe Mwenyezi Mungu, tunawakabidhi kwako mashahidi waliotoa maisha yao katika kulinda ardhi yao; uwajaalie daraja za juu pamoja na Manabii na watu wema.
Ewe Mwenyezi Mungu, wape subira na utulivu familia zao, waponye majeruhi wao, na uwawezesha kupata uhuru walioshikwa mateka.
Ewe Mwenyezi Mungu, uwe Msaidizi wa watu wetu popote walipo na uwape ushindi dhidi ya madhalimu.
Enyi waumini, imani si kauli na itikadi tu, bali pia ni matendo mema, huruma, na kusaidiana. Katika hali hizi ngumu, ambapo mateso yameongezeka na mahitaji ya waliojeruhiwa na waliokimbia makazi yao yamezidi, wajibu wetu wa kidini na kibinadamu unatuhitaji kuwapa mkono wa msaada ndugu zetu waliopatwa na maafa.
Marja‘iyyah ya juu ya kidini imeruhusu matumizi ya haki za kidini kusaidia kupunguza mateso ya majeruhi nchini Iran na Lebanon. Hili lifanywe kupitia njia zinazoaminika, kama vile ofisi za Marja‘iyyah, na ikiwa mtu anamfahamu binafsi mwenye uhitaji, anaweza kuchukua hatua moja kwa moja kumsaidia.
Wapendwa, Eid ni fursa ya kufufua ahadi na Mwenyezi Mungu, kusameheana na kupatana baina yetu, kudumisha uhusiano wa undugu, na kuwajali maskini na wahitaji.
Na ingawa nyoyo zetu zimejaa huzuni kwa yanayotokea karibu nasi, rehema ya Mwenyezi Mungu ni pana, ufunguzi Wake uko karibu, na nusura Yake hakika itafika — ikiwa mtakuwa na subira na miongoni mwa watu wema.
3496846
