Larijani: Lengo Kuu la Uchokozi wa Marekani na Utawala wa Kizayuni ni kuigawa Iran
Katibu wa Baraza Kuu la Usalama wa Taifa, Ali Larijani, alisema katika mahojiano na Shirika la Utangazaji la Jamhuri ya Kiislamu ya Iran (IRIB) kwamba adui hakuwa analenga mabadiliko madogo ya kisiasa.
“Tangu mwanzo wa vita, lengo lao kuu lilikuwa kuivunja Iran. Hawakuwa wakitafuta mabadiliko madogo,” alisema Larijani.
Aliongeza kuwa Iran ni nchi kubwa sana, na utawala wa Kizayuni hauwezi kulinganishwa nayo kwa ukubwa au uwezo.
Kwa mujibu wa Larijani, lengo la msingi lilikuwa kuigawanya Iran vipande vipande, kwani shabaha halisi ilikuwa uwepo wa Iran yenyewe.
Alifafanua kuwa Marekani na utawala wa Kizayuni walijaribu kufikia azma hiyo kwa njama za kuwaua viongozi wakuu, akiwemo Kiongozi wa Mapinduzi ya Kiislamu, Ayatullah Sayyid Ali Khamenei, pamoja na makamanda wa vikosi vya ulinzi.
Dkt. Larijani alisema mkakati wa adui ulikuwa kusababisha mshtuko mkubwa na mkanganyiko kwa wananchi wa Iran, ili kupitia hali hiyo waweze kuchochea kupinduliwa kwa serikali na hatimaye kuvunjika kwa taifa la Iran. Aliongeza kuwa hata ujumbe wa hivi karibuni wa Rais wa Marekani, Donald Trump, kwenye mitandao ya kijamii unaonyesha wazi kwamba walikuwa na azma ya kuivunja Iran.
Kwa mujibu wa kiongozi huyo wa usalama wa taifa, Marekani ilidhani ingeweza kurudia Iran kile ilichokifanya Venezuela, kutumia hali ya mshtuko wa kisiasa kubadilisha mazingira ya nchi na kuisukuma katika machafuko. Lakini, alisema, hawajaelewa nafsi na utamaduni wa watu wa Iran.
Larijani alieleza kuwa taifa la Iran linaongozwa na urithi wa tukio la Karbala na mapambano ya Imam Husayn (AS). Ingawa tukio hilo lilikuwa na huzuni na mshtuko mkubwa, ndani yake kuna ushujaa, subira, na uthabiti. Huo ndio msingi wa uimara wa watu wa Iran.
Alisema Marekani ilipanga kwamba kwa kumuua Ayatollah Khamenei, ingeweza kuvuruga muundo wa serikali ya Iran na kumaliza vita haraka kwa mashambulizi makali. Walidhani Iran ingeanguka, lakini badala yake wao wenyewe walijikuta wamenaswa katika mgogoro huo.
Afisa huyo pia alisema adui alipanga kwanza kuvunja ari ya wananchi wa Iran kwa shambulio kubwa la awali, kisha kuvuruga maisha ya kila siku kwa kusababisha upungufu wa mahitaji muhimu kama mafuta na chakula. Hata hivyo, licha ya kuongezeka kwa safari na matumizi ya mafuta, serikali ya Iran iliweza kuhakikisha wananchi wanapata mahitaji yao.
Larijani pia alikanusha madai kwamba baadhi ya makamanda wa kijeshi wa Iran waliwasiliana na Marekani ili kujisalimisha. Alisema majeshi ya Iran bado yanapigana kikamilifu na kuendelea kurusha makombora yanayoweka shinikizo kwa adui.
Aidha, alibainisha kuwa adui alijaribu pia kuchochea makabila ya Iran, hasa Wakurdi, dhidi ya serikali ili kuendeleza fikra za kujitenga. Lakini Wakurdi ni sehemu ya kihistoria ya taifa la Iran, na wanakumbuka jinsi Marekani ilivyowatendea makundi ya Kikurdi nchini Syria, kwa kuwaahidi msaada kisha kuwaacha peke yao. Kwa sababu hiyo, hawana imani na Marekani na hawakuunga mkono juhudi hizo.
3496671
